تەرمی ژنێک لە چوارقوڕنە دۆزرایەوە؛ گومان دەکرێت خۆی کوشتبێت

ئاڤا نیوز

ئەمڕۆ هەینی، تەرمی ژنێکی تەمەن 23 ساڵ لە ماڵەکەی خۆیدا لە گەڕەکی قەندیلی ناحیەی چوارقوڕنە دۆزرایەوە. بەپێی لێکۆڵینەوە سەرەتاییەکان، گومانی خۆکوشتن لە ڕووداوەکە دەکرێت و تەرمەکەی بۆ لێکۆڵینەوەی زیاتر ڕەوانەی پزیشکی دادی سلێمانی کراوە.

لێدوانی فەرمی: سەرچاوەیەکی ئاگادار بە ئاڤای ڕاگەیاند، "ئەمڕۆ هەینی، دەوروبەری کاتژمێر 12ـی نیوەڕۆ، تەرمی ژنێک لە ماڵەکەی خۆیدا لە ناحیەی چوارقوڕنەی سەر بە ئیدارەی ڕاپەڕین دۆزرایەوە." سەرچاوەکە ئاماژەی بەوەش کرد کە بەپێی لێکۆڵینەوە سەرەتاییەکان، وا دەردەکەوێت کە ژنەکە خۆی خنکاندبێت.

ئەوەی پێویستە بیزانیت: تەرمی ژنەکە سەرەتا ڕەوانەی پزیشکی دادی ڕانیە کراوە، بەڵام دواتر لەسەر داوای کەسوکارەکەی، بۆ لێکۆڵینەوەی زیاتر و دڵنیابوونەوە لە هۆکاری ڕاستەقینەی گیانلەدەستدانی، گواستراوەتەوە بۆ پزیشکی دادی سلێمانی.

تا ئێستا هێزە ئەمنییەکانی ناوچەکە ئامادە نەبوون هیچ زانیارییەکی فەرمی لەسەر ڕووداوەکە ئاشکرا بکەن.

زانیاریی پەیامنێر: بەپێی زانیارییەکانی پەیامنێری ئاڤا، ئەو ژنە تەمەنی 23 ساڵە، خێزاندار بووە و خاوەنی منداڵێکە. "ڕووداوەکە بەهۆی کێشەیەکی کۆمەڵایەتییەوە بووە."

ژمارەکان وادەڵێن: بەپێی ئامارەکان، لە ماوەی شەش مانگی یەکەمی ئەمساڵدا، سێ ڕووداوی خۆکوشتن لە سنووری ئیدارەی ڕاپەڕین تۆمار کراون، کە دووانیان ژن بوون. ئەمەش لە کاتێکدایە کە بە گشتی ڕووداوەکانی کوشتن و خۆکوشتن لە ناوچەکەدا کەمبوونەوەیان بەخۆوە بینیوە.