بۆ نۆژەنکردنەوەی هێڵی نەوتی کەرکوک - بانیاس وەزیری وزەی سووریا سەردانی عێراق دەكات

ئاڤا نیوز

وەزیری وزەی سووریا، ئاشكرايكرد، بۆ پرسی نۆژەنکردنەوەی ئەو هێڵە نەوتییەی کە کەرکوک بە بەندەری بانیاسی سووریا دەبەستێتەوە،  بریارە لەداهاتوویەکی نزیکدا سەردانی عێراق بکات.

چیرۆکی سەرەکی: مانگی نیسانی ڕابردوو، عێراق شاندێکی فەرمیی باڵای ڕەوانەی سووریا کرد بەمەبەستی لێکۆڵینەوە لەلایەنی تەکنیکی و ئابووریی نۆژەنکردنەوە و کارپێکردنەوەی هێڵی بۆریی کەرکوک - بانیاس کە بە یەکێک لە کۆنترین ڕێڕەوەکانی هەناردەکردنی نەوت لە ڕۆژهەڵاتی ناوەڕاست دادەنرێت.

لێدوانی فەرمی: محەممەد بەشیر، وەزیری وزەی سووریا ڕایگەیاند: عێراق و سووریا ڕێککەوتوون لەسەر نۆژەنکردنەوەی هێڵی کەرکووک – بانیاس و خستنەوە کاری بۆ هەردوو وڵات زۆر گرنگە بۆ ئەو مەبەستەش بەم زووانە سەردانی عێراق دەکەم.

زانیاریی زیاتر: بەپێی ڕاپۆرتە ئابووریەکان،  تێچووی سەرەتایی بۆ نۆژەنکردنەوەی بۆرییەکە کە لە ساڵی 2003 زیانی بەرکەوتووە و بە تەواوی کاری پێنەکراوە، بە نزیکەی 300 بۆ 600 ملیۆن دۆلار مەزەندە دەکرێت.

ئەوەی پێویستە بیزانیت: ئەم هێڵە لە پەنجاکانی سەدەی ڕابردوودا دروستکراوە و لە ساڵی 1952 بە فەرمی خراوەتە کار، درێژییەکەی نزیکەی 800 کیلۆمەترە و توانای گواستنەوەی 300 هەزار بەرمیل نەوتی لە ڕۆژێکدا هەیە.