دیمەشق هەڕەشەی هەڵوەشاندنەوەی دانوستانەکانی پاریس لەگەڵ هەسەدە دەکات

ئاڤا نیوز

حکومەتی سووریا لێکۆڵینەوە لە هەڵوەشاندنەوەی ئەو خولەی دانوستانانە دەکات کە بڕیارە لە پاریس لەگەڵ هێزەکانی سووریای دیموکرات بەڕێوەبچێت. هۆکاری ئەم هەڵوێستە دەگەڕێنێتەوە بۆ "جدی نەبوونی هەسەدە" لە جێبەجێکردنی ڕێککەوتنی 10ی ئازار.

چیرۆکی سەرەکی: ڕۆژی 8ـی ئاب، کارەکانی کۆنفرانسی "یەکڕیزیی هەڵوێستی پێکهاتەکانی باکوور و ڕۆژهەڵاتی سووریا" لە شاری حەسەکە کۆتایی هات. جەخت لەسەر پێویستیی داڕشتنی دەستوورێکی دیموکراتی و سیستەمێکی لامەرکەزی کرایەوە کە ماف و بەشداریی هەموو پێکهاتە نەتەوەیی و ئایینییەکانی سووریا مسۆگەر بکات و ڕێگە بۆ دادپەروەریی گواستنەوە و گەڕانەوەی ئاوارەکان خۆش بکات.

زانیاریی بەدەستهاتوو: بەگوێرەی سەرچاوەیەکی حکومی لە دیمەشق کە قسەی بۆ ئەنادۆڵی تورکی کردووە، ڕایگەیاندووە کە ئەم هەنگاوەی هەسەدە بە "پەرەسەندنێکی مەترسیدار" دادەنێن و ئەگەر هەسەدە پلانێکی کرداری بۆ جێبەجێکردنی ڕێککەوتنی ئازار پێشکەش نەکات، ئەوا دیمەشق ئامادەیە دانوستانەکانی پاریس هەڵبوەشێنێتەوە.

ئەوەی پێویستە بیزانیت: ڕێککەوتنی 10ی ئازار، کە لەنێوان ئەحمەد شەرع، سەرۆکی سووریا و مەزڵووم عەبدی، فەرماندەی هەسەدە واژۆ کراوە، لەسەر تێکەڵکردنی هەسەدە و دامەزراوەکانی "بەڕێوەبەرایەتیی خۆسەر"ـە بە دامەزراوەکانی دەوڵەتی سووریا.

لەلایەکی دیکەوە: ماڵپەڕی "ئەلمۆنیتۆر" ئاشکرای کردووە کە تورکیا فشاری لەسەر دیمەشق دروست کردووە بۆ پاشەکشەکردن لەم دانوستانانە، کە لەلایەن ئەمریکا و فەرەنساوە پشتیوانی دەکرێن.