بۆ دووەم ساڵ "محەممەد" پێشەنگی ناوی تازە لەدایکبووانی کوڕە لە ئینگلتەرا و وێڵز

ئاڤا نیوز

بەپێی ڕۆژنامەی "زەسەن"ـی بەریتانی، بۆ دووەم ساڵی لەسەریەک، ناوی "محەممەد"  پێشەنگی ناوی لەدایکبووانی کوڕە لە ئینگلتەرا و وێڵز.

چیرۆکی سەرەکی: ڕۆژنامەی "زەسەن"ـی بەریتانی بە پشتبەستن بە  داتاکانی نووسینگەی ئاماری نیشتمانیی بەریتانیا، ئاماری زۆرترین ناوی تازە لەدایکبووانی لە ئینگلتەرا و وێڵز بڵاوکردووەتەوە.
 

ڕاگەیێنراوی فەرمی: ڕۆژنامەکە بەپێی داتاکانی ساڵی 2024 بڵاویکردووەتەوە، زیاتر لە 5721 منداڵی تازە لەدایکبوو کە لە ڕەگەزی نێرن ناوی "محەممەد" (Muhammad) یان لێنراوە.

زانیاریی زیاتر: ڕۆژنامەکە ئەوەشی ڕوونکردووەتەوە، ئامارەکان تەنیا شێوازی نووسینی "Muhammad" ناوە عەرەبییەکەیان هەژمار کردووە، لەکاتێکدا هەمان ناو بە شێوازێکی دیکەی نووسین کە "Mohammed"ـە، لە 1760 منداڵی دیکەی تازە لەدایکبوو نراوە. بەمەش کۆی گشتیی ئەو منداڵانەی کە ئەم ناوەیان لێنراوە لە ئینگلتەرا و وێڵز بەرزدەبێتەوە بۆ 7481 منداڵ.

لەلایەکی دیکەوە: بەپێی داتای ناوەندێکی توێژینەوەیەکی فەرەنسی ئاماژە بەوەکراوە کە ناوی پێغەمبەر "محەممەد" زۆرترین و بڵاوترین ناوی نێرینەیە لەسەر ئاستی جیهان.