تەرمی عەرەبێکی هاوردە لە نزیک گوندەکانی ناحیەی سەرگەڕان دەدۆزرێتەوە

ئاڤا نیوز

شەوی ڕابردوو، تەرمی عەرەبێکی هاوردە لەنێوان گوندی پەلکانە و شەناغە لە سنووری ناحیەی سەرگەڕان بە کوژراوی دەدۆزرێتەوە و پۆلیسی کەرکووکیش دەستی بە لێکۆڵینەوە لە ڕووداوەکە کردووە.

زانیاریی پەیامنێر: شایەتحاڵێک لە سنووری ناحیەی سەرگەڕان بە دیار محەممەد، پەیامنێری ئاڤا میدیای ڕاگەیاندووە، دانیشتووانی هەردوو گوندی پەلکانە و شەناغە تەرمی کەسێکی بەنەتەوە عەرەبیان لە سنوورەکە دۆزیوەتەوە کە لەلایەن چەند کەسێکی نەناسراو کوژراوە.

زانیاریی زیاتر: بە وتەی ئەو شایەتحاڵە، دوای ئاگادارکردنەوەی دەزگا ئەمنییەکان بە بوونی تەرمێک، هێزەکانی سووپای عێراق گەیشتوونەتە شوێنی ڕووداوەکە و دواتریش تیمەکانی پۆلیس دەستیان بە ڵێکۆڵینەوە کردووە.

باکگراوند: لە ماوەی ڕابردوودا، لەسەر کێشەی زەوی و زار و ڕێگری لە چاندنی بەربوومی کشتوکاڵی، گرژی و ناکۆکی لەنێوان جووتیارە ڕەسەنەکانی سنووری ناحیەی سەرگەڕان و عەرەبە هاوردەکان، دروست دەبوو، چەندین جاریش هێزە ئەمنییەکان بە ئەنقەست، کۆسپ و تەگەرە بۆ ئیشوکاری کشتوکاڵیی جووتیارانی کوردی ڕەسەنی ئەو ناوچانە دروست دەکەن، بەهۆیەوە گرژی و پێکدادانی لێ دەکەوێتەوە.