نێردەی ترمپ و سەرۆکوەزیرانی قەتەر تاوتوێی ئاگربەستی غەززە دەکەن

ئاڤا نیوز

قەتەر و ئەمریکا نێوەندگێریی دانوستانەکانی نێوان فەلەستین و ئیسرائیل دەکەن، بڕیارە ئەمڕۆ شەممە هەر یەک لە نێردەی ترەمپ و سەرۆکوەزیرانی قەتەر لەمبارەیەوە لە ئیسپانیا کۆببنەوە.

زانیاریی بەدەستهاتوو: ماڵپەڕی "ئەکسیۆس"ـی ئەمریکی لەسەر زاری چەند سەرچاوەیەکەوە ئاشکرایکرد، ستیڤ ویتکۆف، نوێنەری دۆناڵد ترەمپ، سەرۆکی ئەمریکا لە ڕۆژهەڵاتی ناوەڕاست، ئەمڕۆ شەممە، لە ئیسپانیا، لەگەڵ شێخ محەمەد بن عەبدولڕەحمان ئال سانی، سەرۆکوەزیرانی قەتەر کۆدەبێتەوە، بۆ تاوتوێکردنی پلانێک بۆ کۆتاییهێنان بە شەڕی غەززە و ئازادکردنی بارمتەکان.

زانیاریی زیاتر: بەگوێرەی ئەکسیۆس، قەتەر و ئەمریکا سەرقاڵی داڕشتنی پێشنیازێکن بۆ ڕێککەوتنێکی هەمەلایەنە کە لەماوەی دوو هەفتەدا بخرێتە بەردەم بزووتنەوەی حەماس و ئیسرائیل. ئاماژەیان بەوەشکردووە، ناکۆکیی نێوان هەردوولا سەبارەت بە کۆتاییهێنان بە شەڕەکە هێشتا "گەورەیە" و باس لە ڕێککەوتنی کۆتایی لەم کاتەدا "بێسوودە".

ماڵپەرەکە ئاماژەی بەوەشکردووە، پلانی هێرشکردن و داگیرکردنی شاری غەززە لەنێو کەرتی غەززە دەستبەجێ جێبەجێ ناکرێت، هەروەها هیچ خشتەیەکی کاتی بۆ دەستپێکردنی ئۆپەراسیۆنەکە دانەنراوە، ئەمەش دەرفەت بۆ گەیشتن بە چارەسەرێکی دیپلۆماسی دەڕەخسێنێت.

گۆشەیەکی دیکەی دیمەنەکە: ئەکسیۆس دەڵێت؛ بنیامین نەتانیاهۆ، سەرۆکوەزیرانی ئیسرائیل دەرگای بە کراوەیی هێشتووەتەوە بۆ ڕاگرتنی ئۆپەراسیۆنی سەربازی لە غەززە، ئەگەر دانوستانەکان بۆ گەیشتن بە ڕێککەوتن دەست پێبکەنەوە.