كۆمیسیۆن: تیروپشكی كاندید و قەوارەكان لە ژمارە 201ـەوە دەستپێدەكات

ئاڤا نیوز

بەڕێوەبەری دەستەی هەڵبژاردنەکانی عێراق لە هەرێمی کوردستان، تایبەت بە ئاڤا ڕایدەگەیەنێت، ئێوارەی ئەمڕۆ شەممە، كۆمیسیۆن تیروپشك بۆ ژمارەی قەوارە سیاسییەكان، هاوپەیمانییەكان و كاندیدەكان دەكات، ئاڤا زانیویەتی تیروپشكەكە لە ژمارە 201ـەوە دەستپێدەكات.

وێنە گەورەکە: بڕیارە 11ـی تشرینی دووەمی ئەمساڵ هەڵبژاردنی پەرلەمانی عێراق بکرێت، بۆ ئەم مەبەستە کۆمیسیۆن بەپێی خشتەی ئامادەکارییەکانی هەڵبژاردن، دەستی بە جێبەجێکردنی ڕێکار و ئامادەکارییەکان کردووە.

ئەوەی پێویستە بیزانیت: بۆ هەڵبژاردنی پەرلەمانیی عێراق، 31 هاوپەیمانی، 38 قەوارەی سیاسی، 23 كاندیدی سەربەخۆ و 56 كاندیدی پێكهاتەكان تۆماركراون.

لێدوانی فەرمی: نەبەرد عومەر، بەڕێوەبەری دەستەی هەڵبژاردنەکانی عێراق لە هەرێمی کوردستان، لە لێدوانێكی تایبەتدا بۆ ئاڤا ڕایگەیاند، تیروپشكەكە لە ژمارە (201)ـەوە دەستپێدەكات و تەنیا ژمارە "256" لە تیروپشكەكە دەرهێنراوە بەو پێیەی ژمارەكە نزیكە لە ژمارەی ماددەی 456 لە یاسای سزاكانی عێراقی و ماددەكەش پەیوەستە بە تاوانەكانی فێڵكردن و ساختەكاری و گەندەڵی، "ژمارەكە ناوبانگێكی نەشیاوی هەیە و هیچ كاندید و حیزب و لایەنێك حەزناكات ئەو ژمارەیەی بەركەوێت و لە ماوەی هەڵمەتی هەڵبژاردن، دووچاری شەرمەزاری ببێت."

زانیاریی زیاتر: نەبەرد عومەر باسی لەوەشكرد، وردبینیكردن لە ناوی كاندیدەكان لەلایەن هەردوو وەزارەتی ناوخۆی عێراق و هەرێمی كوردستان و هەردوو دەستەی دەستپاكی و وەزارەتی خوێندنی باڵا لە هەرێمی كوردستان و عێراق  بەردەوامە، بە مەبەستی دڵنیابوونەوە لە ڕاستی و دروستی بڕوانامەی خوێندن و نەبوونی پاشخانی تاوانیی كاندید و نەبوونی دۆسیەی گەندەڵی و ناپاكی پێشووتر لەسەر ناوەكانیان.

لەلایەکی دیکەوە: ئەوانەی بۆ ئەركی كارمەندی سەر سندووق، فۆرمی ئەلیكترۆنییان پڕكردووەتەوە؛ سبەی یەكشەممە 10ـی ئابی 2025، دوا وادەیە بۆ گەڕاندنەوەی فۆرمەكان بۆ بنكە لاوەكییەكانی سەر بە كۆمیسیۆن و دوای ئەو وادەیە هیچ فۆرمێك وەرناگیرێتەوە.