زانایەکی گەورەی کورد لە شاری سنە کۆچی دواییکرد

ئاڤا نیوز

مامۆستا سەید عەبدولحەمید حیرەت سەججادی، زانای دیاری کورد، لە تەمەنی 96 ساڵی، لە شاری سنەی ڕۆژهەڵاتی کوردستان، کۆچی دوایی کرد.

ئەوی پێویستە بیزانیت: مامۆستا سەیید عەبدولحەمید حیرەت سەججادی بە مامۆستای ئەخلاق وەسف کراوە؛ نووسەر و لێکۆڵەرێکی گەورە، مێژووناس و  فێرکارێکی لەخۆبووردە بوو و خزمەتێکی زۆری بە ئایینی ئیسلام و مێژووی کوردستان کردووە.

زانیاریی زیاتر: لە شارەکانی لە ورمێ و مەشهەد مێژوو و ئەدەبیاتی خوێندووە و فێری زانستەکان بووە؛ دواتر لە زانکۆی تاران ئایینناسی خوێندووە و بووەتە مامۆستا. سەرەڕای مامۆستایەتی کاری توێژینەوەی لە بواری مێژوو، فۆلکلۆر و ئەدەبیاتی کوردیی ئەنجام داوە.

خاوەنی چەندین بەرهەمی گرنگە، لەوانە: کاریگەریی قورئان لەسەر شیعری فارسی، شاعیرانی کوردی فارسی نووس، پەندی پێشینیانی کوردی و فارسی، گوڵزاری شاعیرانی کوردستان، مێژووی پەروەردە و فێرکردن لە کوردستان، عەشایری کوردستان، ناودارانی زانست و فەرهەنگ و هونەری کوردستان و چەندین بەرهەمی دیکە. 

باکگراوند: مامۆستا سەیید عەبدولحەمید حیرەت سەججادی کوڕی شاعیر 'ڕوکنولئیسلام'ـە و خەڵکی گوندی 'کەلجی'ـیە لە هەورامانی ڕۆژهەڵاتی کوردستان. لە سنە لەدایک بووە، هەر لەوێش کۆچی دوایی کرد.