کۆتایی ئەم مانگە 90%ـی پێداویستییەکانی پڕۆژەی ئاوی قوشتەپە دەگات

ئاڤا نیوز

کارکردن لە پڕۆژەی ئاوی قوشتەپە بەردەوامی هەیە، تا ئێستا زیاتر لە نیوەی کارەکان تەواو کراون، بڕیارە هەموو پێداویستییەکانی پڕۆژەکە تا کۆتایی ئەم مانگە لە ئەوروپاوە بگاتە شوێنی پڕۆژەکە.

وێنە گەورەکە: پڕۆژەی ئاوی قوشتەپە کە لەسەر ئاوی زێی بچووک جێبەجێ دەکرێ، مانگی 9ـی ساڵی پار مەسرور بارزانی، سەرۆکوەزیرانی کوردستان بەردی بناغەی پڕۆژەکەی دانا. دوای تەواو بوونی، 63 هەزار کەس لێی سوودمەند دەبن، ئاو دەگەیێنێتە قەزای قوشتەپە و ناحیەی بێستانە و 72 گوند.

لێدوانی فەرمی: ڕێزان سەعدی، بەڕێوەبەری ئاوی دەوروبەری هەولێر بە ئاڤا میدیای وت، بەشی هەرە زۆری ئامێرەکانی پڕۆژەی ئاوی قوشتەپە لە وڵاتانی ئەوروپا وەک ئەڵمانیا و دانیمارک کڕاون، تا کۆتایی ئەم مانگە 90%ـی پێداویستییەکان دەگەنە شوێنی پڕۆژەکە.

بەوتەی ڕێزان سەعدی، ئەو ئامێرانەی ئێستا گەیشتوون ئەمانەن (ترومپای وەرگرتنی ئاو، قوفڵەکانی هێلی سەرەکی، دوو لە ڕشێنەرەکان، ترومپا بۆ گوندەکان و کرێنەکان). ئەوانی دیکەش لە کۆتایی ئەم مانگە دەگەن.

بەشەکانی پڕۆژەکە لەم قۆناغانەن:

- ئەو بەشەی دەکەوێتە سەر زێیەکە و ئاوی لێ وەردەگیرێ، 64%ـی کارەکانی تەواو کراوە. 

- دوو وێستگەی تێدایە، ئاو پاڵدەنی بۆ ناو بۆڕییەکان و هەریەکەیان 56%ـی کارەکانی تەواو کراون.

- بۆری 800 ملیمی بە درێژی 37 کیلۆمەتر جێبەجێکراوە و دانراوە.

- ئەو بۆرییەی ئاوەکە دەگەیێنێتە گوندەکان و ناوچەکە، درێژیەکەی 262 کیلۆمەترە، 88%ـی بۆرییەکان دانراون.

- کاروباری کارەبای پڕۆژەکە %90ـی تەواو کراوە.

-    ئێستا 64%ـی پڕۆژەکە تەواو کراوە.

ژمارەکان وادەڵێن: 222 ملیار دینار بۆ پڕۆژەی ئاوی قوشتەپە تەرخانکراوە، لە کاتژمێرێکدا سێ هەزار مەتر سێجا بۆ هاونیشتمانیان دابین دەکات.