پلاندانانی عێراق: داهاتی پلانی گەشەپێدان بە 700 تریلیۆن دینار دەخەمڵێنرێت

ئاڤا نیوز

وەزارەتی پلاندانانی عێراق دەڵێت، ئەو پلانە پێنج ساڵییەی گەشەپێدان کە حکومەت دایناوە پێشبینی دەکات کۆی سەرمایەی دەوڵەت لەو ماوەیەدا 700 تریلیۆن دینار تێپەڕێنێت، نزیکەی 89%ی ئەو داهاتەش لە فرۆشتنی نەوتەوە سەرچاوە دەگرێت.

چیرۆکی سەرەکی: پلانی گەشەپێدان (2024-2028) ڕوانگەی پێنج ساڵەی حکومەتی عێراقە بۆ کارکردن لەسەر پڕۆژەکانی گەشەپێدان و ڕووبەڕووبوونەوەی ئاستەنگییەکانی وەک ژینگە، کەمی ئاو و بێکاریی و سوود وەرگرتن لە بەرهەمهێنانی کارەبا بە وزەی خۆر، پلانەکە داوای پەرەپێدانی زیاتری کەرتی تایبەت و ڕەخساندنی هەزاران هەلیکار لەم بوارەدا دەکات.

لێدوانی فەرمی: عەبدولزەهرە هینداوی، وتەبێژی وەزارەتی پلاندانانی عێراق ڕایگەیاند، پێشبینیی دەکەن داهاتی پلانی گەشەپێدان کە ماوەکەی پێنج ساڵە، دەوروبەری 710 تریلیۆن دینار بێت لەو بڕەش 631 تریلیۆن دیناری لە فرۆشتنی نەوت و 79  تریلیۆن دیناری دیکەش لە داهاتی نانەوتییەوە بەدەست دەهێنرێت.

بەگوێرەی پلانەکە هەوڵ دەدرێت گەشەی ئابووری عێراق لەو پێنج ساڵەدا بگەیێنرێتە 4.24 % ئەویش لەڕێگەی وەبەرهێنان بە قەبارەی 241 تریلیۆن دینار، لەو بڕەش 157 تریلیۆن دیناری لەڕێگەی کەرتی حکومەت و 84 تریلیۆن دیناری دیکەش لەڕێگەی کەرتی تایبەتەوە دەبێت، لەو بڕی وەبەرهێنانەش 27.4 %ـی لە کەرتی نەوت، 22.5 % لە کەرتی نیشتەجێ بوون، 20.8 % لە کەرتی گەشەپێدانی کۆمەڵایەتی، 8.6 % لە کەرتی ئاو و کارەبا و 7.8 %ی دیکەش لە کەرتی پیشەسازییدا دەبێت.