کارکردن لە زۆنی دووەمی پڕۆژەی ڕووناکی لە سۆران دەست پێدەکات

ئاڤا نیوز

پڕۆژەی ڕووناکی گەیشتووەتە چوار گەڕەک و بڕیارە لەماوەی 13 ڕۆژدا تەواوی سەنتەری قەزای سۆران لە کارەبای 24 کاتژمێری سوودمەند ببن، دواتر لە قەزاکانی دەورووبەر پرۆسەکە دەست پێدەکات.

وێنە گەورەکە: : پڕۆژەی ڕووناکی، یەکێکە لە پڕۆژە ستراتیژییەکانی کابینەی نۆیەمی حکومەتی هەرێمی کوردستان، بەرنامە ئەوەیە تا کۆتایی ساڵی 2026 هەموو شارەکانی هەرێمی کوردستان ببنە خاوەنی کارەبای 24 کاتژمێری، لەسۆران پرۆسەکە دەستیپێکردووە و گەیشتووەتە زۆنی دووەم.

لێدوانی فەرمی: ئەردەوان ئیبراهیم، بەڕێوەبەری گشتیی کارەبای سۆران بە ئاڤای گوت، "سەنتەری قەزای سۆران بەسەر شەش زۆن دابەشکراوە، لە زۆنی دووەم پرۆسەکە دەستپێدەکەین بە ئەگەری زۆرەوە گەڕەکەکانی زانیاریی، خەبات و بارزان دەگرێتەوە، لەماوەی 13 ڕۆژدا هەموو زۆنەکان تەواو دەبن."

ئەوەی پێویستە بیزانیت: بەجێبەجێکردنی پڕۆژەی ڕووناکی لە ئیدارەی سەربەخۆی سۆران 116 موەلیدە دەکوژێنەوە، بەمەش ژینگەی ناوچەکە زیاتر پاک دەبێتەوە.