حەجخوازان چۆن خۆیان بۆ پرۆسەی حەج تۆمار دەکەن؟

ئاڤا نیوز

وەزارەتی ئەوقاف ماڵپەڕی "دەروازەی حەج"ـی بۆ خۆتۆمارکردنی حاجییان ڕاگەیاند و ئاڤا میدیا شێوازی خۆتۆمارکردنەکە بەشێوەی ئەلیکترۆنی بڵاو دەکاتەوە.

 

چیرۆکی سەرەکی: ئەمڕۆ یەکشەممە 10-8-2025، وەزارەتی ئەوقاف ماڵپەڕی "دەروازەی حەج"ـی بۆ تۆماری ساڵانەی حاجییان لە پرۆسەی حەج ڕاگەیاند، بەم شێوەیە حاجییان دەتوانن بەشێوەی ئەلیکترۆنی و بەبی بەرامبەر خۆیان بۆ پرۆسەی حەج ناونووس بکەن.

 

ئەوەی پێویستە بیزانیت: بۆ ئەوەی خۆتان بۆ حەج ناونووس بکەن، دەبێت سەردانی لینکی وێبسایتی دەروازەی حەج بکەن. یەکەمجار بە ژمارە موبایلەکەت دەچیتە ژوورەوە، کودێکی شەش ژمارەییت بۆ دێت و وەک خۆی لەسەر سایتەکەی دەنووسیتەوە، کە ژمارەکەت قبووڵکرا لێت دەپرسێت ئایە هاووڵاتی ئاسایی، یان کۆمپانیا و مامۆستای ئایینی و دەتەوێت ببیتە ڕێبەر، ئایا پیاویت و بە تەنیا دەچیتە حەج یان ئافرەتی، یان ئافرەتی و لەگەڵ مەحرەم دەچیت.

 

زانیاریی زیاتر: دواتر لەسەر ماڵپەڕەکە زانیارییەکانی نیشتەجێبوونت بەپێی کارتی زانیاری و پارێزگا لێ دەپرسێت. زمانی پەیوەندیش لە سایتەکە بەردەستە. لە کۆتا هەنگاوی خۆتۆمارکردنەکە، دەچێتە سەر پێناسی دیجیتاڵی، زانیارییە کەسییەکان، ژمارەی موبایل و وردەکاریی پاسپۆرت، دواتر وێنەیەکی ڕووخسارت لەسەر سایتەکە هاوپێچ دەکەیت، لەگەڵ ڕووی پێشەوە و دواوەی کارتی نیشتمانی، دواتر ڕووی پێشەوە و دواوەی کارتی زانیارییەکەت هاوپێچ دەکەیت.

 

گۆشەیەکی دیکەی دیمەنەکە: کاتێک ئەو ڕێکارانە دەگریتە بەر و ناوەکەت لە سایتەکە وەردەگیرێت، چاوەڕێی تیروپشک دەکەیت و لەڕێگەی سایتەکەشەوە ئەنجامەکەی وەردەگریتەوە.