پێداچوونەوەی زمانەوانی بۆ ماستارنامە و تێزی دكتۆرای بەشەكانی زمان دەکرێتە مەرج

ئاڤا نیوز

لەمەودوا هەر بڕوانامەیەكی ماستەر و دكتۆرا لە بەشەكانی زمان ببەخشرێت، پێویستە هاوشێوەی بەشەكانی كۆلێژەكانی دیكە، بەر لە تاوتوێكردنی ماستارنامەكە یاخود تێزی دكتۆراكە، پێداچوونەوەی زمانەوانی بۆ بكرێت.

نووسراوی فەرمی: بەگوێرەی نووسراوێكی وەزارەتی خوێندنی باڵا و توێژینەوەی زانستی كە وەڵامی نووسراوێكی زانكۆی ڕاپەڕینی داوەتەوە و وێنەیەكی دەست ئاڤا میدیا كەوتووە، تێیدا دوو خاڵ لەبارەی پێداچوونەوەی زمانەوانی بۆ ئەو ماستارنامە و تێزی دكتۆرایانە ڕوونكراوەتەوە كە لە بەشەكانی زمانی كوردی، عەرەبی و ئینگلیزی دەنووسرێن.

بەپێی نووسراوەكە، دوو خاڵ پەیوەست بە پێداچوونەوەی زمانی بەمشێوەیە ڕوونكراوەتەوە:

یەكەم: پێویستە پێداچوونەوەی زمانەوانی بۆ ماستەرنامە و تێزی دکتۆرای قوتابیان و خوێندکارانی ماستەر و دکتۆرا لە گشت بەشەکان ئەنجام بدرێت، هیچ بەشێک بەدەرناکرێت لە پێداچوونەوەی زمانەوانی و بەشەکانی زمانی کوردی و عەرەبی و ئینگلیزیش وەک بەشەکانی دیكە، ئەو پێداچوونەوەیان بۆ دەکرێت.

دووەم: سەرپەرشتیارانی ماستەرنامە و تێزی دکتۆرای قوتابیان و خوێندکارانی  ماستەر و دکتۆرا لە پسپۆڕییەکانی سەر بە بەشەکانی زمانەکانی (كوردى، عەرەبی و ئینگلیزی)، بە هۆی ئەوەی خۆیان پسپۆرییەکانیان بریتییە لە یەکێک لەو زمانانە، دەتوانن پێداچوونەوەی زمانەوانی بۆ ماستەرنامە و تێزی دکتۆرا بکەن و پێویست ناكات كەسێكی دیكەی سەرپەرشتیاریی زمانەوانی ئەو كارە بكات، پێویستە سەرپەرشتیار واژۆ لەسەر فۆرمی پێداچوونەوەی زمانەوانی ماستەرنامە و تێزی دکتۆرا بکات.