شانەیەکی داعش کە پلانیان بە ئامانجگرتنی سەردانیکەرانی ئەربەعینی بوو دەستگیر کران

ئاڤا نیوز

دادگای لێکۆڵینەوەی کەربەلا دەستگیرکردنی تۆڕێکی تیرۆریستیی سەر بە داعشی ڕاگەیاند کە بەنیازبوون زیارەتکارانی بەشداربوو لە سرووتەکانی چلەی ماتەمینی ئیمامی حوسێن بکەنە ئامانج.

وێنە گەورەکە: ساڵانە ملیۆنان موسڵمانی شیعە مەزهەب لە ناوخۆی عێراق و وڵاتانی جیهانەوە بەرەو شاری کەربەلا بەڕێدەکەون بۆ بەشداریکردن لە ڕێوڕەسمی چلەی ماتەمینی ئیمامی حوسێن، تەنیا لە چەند ڕۆژانی ڕابردوودا زیاتر لە سێ ملیۆن کەس سەردانی عێراقیان کردووە بۆ ئەو مەبەستە.

ڕاگەیێنراوی فەرمی: لە ڕاگەیێنراوێکدا دادگای لێکۆڵێنەوەی کەربەلا ڕایگەیاند: 23 تیرۆرستی سەر بە داعش لە پارێزگاکانى باشوور و فوڕاتى ناوەڕاست و بەغدا دەستگیرکراون و لێدوانەکانیان لەلایەن دەسەڵاتى دادوەرییەوە پشتڕاستکرایەوە کە دانیان بە پلانێکی تیرۆریستیدا ناوە ئامانج لێی تێکدانی سەلامەتی و ئاسایشی سەردانیکەران بوو لە کاتی "زیارەتی ئەربەعینی"دا، لەوانە دروستکردن و چاندنی ئامێری تەقەمەنی بەدرێژایی ڕێڕەوی سەردانیکەران لە باشووری عێراق، دانانی ژەهری کوشندە لەناو دەفرە خۆراکییەکان بۆ زیارەتکاران، هەروەها سووتاندنی کاروانەکانی خزمەتگوزاری.