بەڕێوەبەری پەروەردەی سلێمانی: سەرووی 38 هەزار قوتابی لە قوتابخانە ناحکومییەکان دەخوێنن

ئاڤا نیوز

بەڕێوەبەری گشتیی پەروەردەی سلێمانی تایبەت بە ئاڤا ئاشكرای دەكات، زیاتر لە 38 هەزار قوتابی لە قوتابخانە ناحكومییەكان دەخوێنن و ئەو قوتابخانانە بوونەتە هاوكارێكی باش بۆ ئەوەی فشار و بارگرانی لەسەر قوتابخانە حكومییەكان كەم ببێتەوە.

وێنە گەورەكە: ساڵانە لەگەڵ نزیكبوونەوەی دەستپێكی وەرزی نوێی خوێندن، لێرە و لەوێ قسە و باس لەبارەی جیاكاری لەنێوان خوێندن لە قوتابخانە حكومییەكان و ناحكومییەكان بەر گوێ دەكەوێت؛ بەڕێوەبەری گشتیی پەروەردەی سلێمانی، لەمیانی بەشداریكردنی لە بەرنامەی مۆری ئاڤا، ئەو گومانانە دەڕەوێنێتەوە.

لێدوانی فەرمی: نەژاد عەبدوڵڵا، بەڕێوەبەری گشتیی پەروەردەی سلێمانی ڕایگەیاند، پێویستە ئەو تێگەیشتنە ڕاست بكرێتەوە كە جیاوازی لە نێوان قوتابخانەی حكومی و ناحکومی بكرێت، بەو پێیەی لەڕووی بایەخپێدانەوە هیچ جیاوازییەك لەنێوانیاندا نییە و تەنانەت قوتابخانە ناحکومییەکان بوونەتە هاوكار و هەماهەنگ بۆ كەمكردنەوەی فشار و بارگرانی لەسەر قوتابخانە حكومییەكان.

- ئێستا قوتابخانە ناحکومییەکان لە هەمان ئەو سیستمە داخڵ كراون كە قوتابخانە حكومییەكانی پێ ڕێكخراوە و ئەو قوتابخانانەش لە چوارچێوەی پرۆگرامەكانی وەزارەتی پەروەردە كار دەكەن و هەمان سیستمی قوتابخانە حكومییەكان پەیڕەو دەكەن.

- بەڕێوەبەری گشتیی پەروەردەی سلێمانی ئاشكرای دەكات، لە سەرجەم پەروەردەكانی سنووری پارێزگای سلێمانی، 38 هەزار و 743 قوتابی لە قوتابخانە ناحكومییەكان دەخوێنن. دوو هەزار و 500 دەستی كار وەكو مامۆستا و وانەبێژ كاردەكەن، 999 فەرمانبەری كارگێڕی و ژمێریاریش لەو كەرتە كاردەكەن؛ بە واتای ئەوەی قوتابخانە ناحکومییەکان، بوونەتە هۆی ڕەخساندنی هەلی كار بۆ ئەو دەرچووانەی زانكۆ و پەیمانگەكان كە نەتوانراوە لە كەرتی گشتیدا دابمەزرێن.