كونسوڵی ئەمریكا: واشنتن لە هاوكارییەكانی بۆ پێشمەرگە بەردەوام دەبێت

ئاڤا نیوز

لەبارەی بەردەوامی هاوکارییەکانی ئەمریکا بۆ وەزارەتی پێشمەرگە، کونسوڵی گشتیی ئەمریکا دڵنیایی بە وەزیری پێشمەرگە دەدات كە هاوكارییەكانی وڵاتەكەی بۆ هێزی پێشمەرگە بەردەوام دەبێت.

چیرۆكی سەرەكی: ئەمڕۆ 10ـی ئابی 2025، شۆڕش ئیسماعیل، وەزیری پێشمەرگەی هەرێمی کوردستان، پێشوازی لە ستیڤن بیتنەر، کونسوڵی گشتیی ئەمریکا لە هەرێمی کوردستان و شاندێکی دیپلۆماسی و سەربازیی ئەمریكی كرد كە بە بۆنەی كۆتاییهاتنی ئەركەكەی و دەستبەكاربوونی كونسوڵی نوێ وێندی گرین، سەردانی دیوانی وەزارەتی پێشمەرگەیان كردبوو.

ڕاگەیێنراوی فەرمی: وەزیری پێشمەرگە ڕۆڵی باڵای كونسوڵی پێشووی ئەمریكا لە هەرێمی كوردستان بەرز نرخاند و ڕایگەیاند: "بیتنەر، لە ماوەی ئەرکەکەیدا بەردەوام پاڵپشت و پشتیوانی گەلی کوردستان و بە تایبەتی وەزارەتی پێشمەرگە بووە. ڕۆڵی باڵا و کاریگەری هەبوو لە پێشخستنی پرۆسەی چاکسازی و بەردەوامی پەیوەندییەکانی نێوان وەزارەتی پێشمەرگە و کونسوڵخانەی ئەمریکا."

هاوكات پیرۆزبایی لە خاتوو 'وێندی گرین' كرد كە وەك كونسوڵی نوێی گشتیی ئەمریكا لە هەرێمی كوردستان دەستبەكار بوو و هیوای سەرکەوتن و بەردەوامی بۆ خواست لە ئەرکەکەیدا.

بابەتە ستراتیژییەكە: لەبارەی بەردەوامی هاوکارییەکانی ئەمریکا بۆ وەزارەتی پێشمەرگە، کونسوڵی گشتیی نوێی ئەمریکا دڵنیایی بە وەزیری پێشمەرگە دا و ڕایگەیاند: "هاوکارییەکانی ئەمریکا بۆ وەزارەتی پێشمەرگە بەردەوام دەبێت."