مەرجی گواستنەوەی قوتابیان بۆ قوتابخانە ئینگلیزییەكان ئاشكرا دەكرێت

ئاڤا نیوز

بەڕێوەبەری گشتیی پەروەردەی هەولێر ڕایدەگەیەنێت، وەرگرتن و گواستنەوەی قوتابیان لە قوتابخانە ئینگلیزییەكان، مەرجی تایبەتی هەیە و لەكاتی ڕكابەریی وەرگرتن لەبەرچاودەگیرێن.

وێنە گەورەكە: بەپێی نووسراوی گشتاندنی وەزارەتی پەروەردەی هەرێمی كوردستان بۆ سەرجەم پەروەردە گشتییەكانی سنووری پارێزگا و ئیدارە سەربەخۆكان، لەكاتی وەرگرتنی منداڵ لە پۆلی یەكەمی قوتابخانە ئینگلیزییەكان، تاكە پێوەر و ڕێكار؛ تیروپشكە، بەڵام بۆ گواستنەوەی قوتابیان لە پۆلی شەشەمی بنەڕەتی بۆ پۆلی حەوتەم، بەپێی نووسراوەكە، كۆمەڵێك پێوەر و مەرج دانراوە.

لێدوانی فەرمی: لوقمان سەعید، بەڕێوەبەری گشتیی پەروەردەی هەولێر، تایبەت بە ئاڤا ڕایگەیاند، بەو پێیەی قوتابخانە ئینگلیزییەكان لۆدێكی زۆریان لەسەرە، لەكاتی گواستنەوەی قوتابی لە پۆلی شەشەمەوە بۆ پۆلی حەوتەمی بنەڕەتی، كۆمەڵێك پێوەر دیاریكراوە و سەرجەم پەروەردەكان پێیوە پابەندن.

لوقمان سەعید ڕوونی دەكاتەوە، پۆلی یەكی بنەڕەتی، بە تیروپشكە. بەڵام وەرگرتنی قوتابیان لە پۆلی حەوتەمەوە چەند پێوەرێك لەبەرچاو دەگیرێت؛ 80% بۆ قوتابیانی قوتابخانە حكومییەكان دانراوە، 15% بۆ قوتابخانە ئینگلیزییە لۆكاڵییەكان و 5%ـش بۆ قوتابخانە ئینگلیزییە نێودەوڵەتییەكانە، هەروەها كۆنمرەی ساڵانی خوێندنی چوار و پێنج و شەشى بنەڕەتی لەگەڵ نمرەی بابەتی ئینگلیزی هەر سێ ساڵ كە دەبێت كۆی گشتی بكاتە 270 نمرە، جگە لەوەش كۆنمرەی هەر سێ ساڵی لە 90% كەمتر نەبێت. بە ڕەچاوکردنی سنووری جوگرافی قوتابییەكە و شوێنی قوتابخانەكە.