لاریجانی لە بەغدایە و دواتریش دەچێتە لوبنان؛ "ڕێککەوتنی ئەمنی لەگەڵ عێراق تاوتوێ دەکەین"

ئاڤا نیوز

ئەمینداری نوێی ئەنجوومەنی باڵای ئاسایشی نیشتمانیی ئێران، گەیشتە بەغدای پایتەختی عێراق. ئەم سەردانە بە یەکەم وێستگەی گەشتێکی هەرێمیی ناوبراو دادەنرێت کە دواتر سەردانی لوبنانیش دەگرێتەوە.

زانیاریی تایبەت: بەگوێرەی سەرچاوەیەکی تایبەت بۆ ئاڤا میدیا، عەلی لاریجانی، ئەمینداری نوێی ئەنجوومەنی باڵای ئاسایشی نیشتمانیی ئێران بە سەردانێکی فەرمی گەیشتە بەغدای پایتەختی عێراق و دواتریش سەردانی لوبنان دەکات.

زانیاریی زیاتر: هەر بەگوێرەی ئەو سەرچاوەیە، عەلی لاریجانی لە میانی سەردانەکەیدا دیداری دەبێت لەگەڵ ڕاوێژکاری ئاسایشی نیشتمانیی عێراق، سەرۆککۆمار، سەرۆکوەزیران، سەرۆکی پەرلەمان و بەشێک لە کەسایەتییە سیاسییەکان لەنێوانیان نووری مالیکی، سەرۆکی هاوپەیمانی دەوڵەتی یاسا.

ئەوەی لەبارەیەوە دەگوترێت: پێش گەشتەکەی بۆ عێراق، عەلی لاریجانی لە لێدوانێکدا سەبارەت بە ئامانجی سەردانەکەی بۆ عێراق، ڕایگەیاند: ئێمە ڕەشنووسی ڕێککەوتننامەیەکی ئەمنیمان لەگەڵ عێراق ئامادە کردووە و بەدواداچوونی بۆ دەکەین."

ناوبراو لەبارەی سەردانەکەی بۆ لوبنانیش ئاماژەی بەوەدا: "لەگەڵ بەرپرسانی لوبنانی گفتوگۆ لەسەر پرسە جیاوازەکان دەکەین. هەروەها هەندێک پەیام هەن کە پێیان ڕادەگەیەنین."

ئەوەی پێویستە بیزانیت: سەردانەکەی لاریجانی دوای ئەوە دێت کە لە 5ـی ئابی ئەمساڵدا، بە فەرمانی مەسعود پزیشکیان، سەرۆککۆماری ئێران وەک ئەمینداری ئەنجوومەنی باڵای ئاسایشی نیشتمانی دەستنیشان کرا و دواتریش لە 7ـی ئاب، ئایەتوڵڵا عەلی خامنەیی، ڕێبەری باڵای ئێران، وەک نوێنەری خۆی لە ئەنجوومەنەکەدا دیاری کرد، کە ئەمەش پێگە و گرنگیی ناوبراو لە داڕشتنی سیاسەتە ستراتیژییەکانی ئێراندا نیشان دەدات.