بەهۆی گواستنەوەی خواردەمەنی ماوەبەسەرچوو، كۆگایەك لە ڕانیە دادەخرێت

ئاڤا نیوز

بەهۆی گواستنەوەی دانەوێڵەی داپۆشراوی ماوە بەسەرچوو لە شارێكەوە بۆ شارێكی دیكە بە مەبەستی دووبارە بەكارهێنانەوەی، لیژنە هاوبەشەكانی قایمقامیەتی قەزای ڕانیە، كۆگایەكی خواردەمەنی لە ڕانیە دادەخەن.

چیرۆكی سەرەكی: لیژنە هاوبەشەكانی قایمقامیەتی قەزای ڕانیە بە هەماهەنگی لەگەڵ بەڕێوەبەرایەتیی ئاسایشی ڕاپەڕین - بەشی ئابووری، كۆگای 'پوار'ـیان داخست، بەهۆی گەڕاندنەوەی خۆراكی وشكە لەجۆری برنج، نۆك و فاسۆلیا لە كۆگای لاوەكیی ڕانیە بەرەو كۆگای سەرەكی لە شاری هەولێر.

هۆكارە زانراوەكان: بەپێی ڕێنماییەكانی لیژنەكانی بەدواداچوون و پشكنینی كۆگا و بازاڕەكان، ڕێگەپێدراو نییە خۆراكی وشكە (دانەوێڵە)ـی ماوەبەسەرچوو یاخود فەل، لە شوێنێكەوە بۆ شوێنێكی تر بگوازرێتەوە یاخود شارە و شاری پێ بكرێت، چونكە تێبینی كراوە، بەشێك لە كۆمپانیاكان دووبارە بەكاری دەهێننەوە و پاكێچینگ دەكرێتەوە و بە كیسی نوێوە دەخرێتەوە بازاڕ.

ڕاگەیێنراوی فەرمی: قایمقامیەتی قەزای ڕانیە لە ڕاگەیێنراوێكدا ئاماژەی بەوە كردووە، سەرەڕای ئاگاداركردنەوەی كۆگای پوار بەوەی كە بەهیچ شێوەیەك ڕێگەپێدراو نییە خۆراكە دانەوێڵەییەكان (برنج و نۆك و فاسۆلیا) بەبیانووی گەڕاندنەوەیان لە كۆگای لاوەكییەوە بۆ بریكاری سەرەكی، بگوازرێنەوە، كەچی كۆگاكە هەر پابەند نەبووە، بۆیە شوێنی كارەكەی داخراوە و لەپێناو پاراستنی سەلامەتیی گشتیش، ڕێكاری یاساییش بەرامبەری دەگیرێتە بەر.