کارەبای نیشتمانی لە بەشێک لە شارەکانی عێراق کوژایەوە

ئاڤا نیوز

لە سەرجەم پارێزگاکانی عێراق و بەغدای پایتەختیش، کارەبای نیشتمانی تووشی کوژانەوەی گشتیی 'شەت داون' بووەتەوە. 
 

لێدوانی فەرمییەکان: نووسینگەی ڕاگەیاندنی وەزارەتی کارەبا بەئاڤای ڕاگەیاند: بەهۆی کێشەیەکی تەکنیکییەوە وێستگەی کارەبای 'حەمزییە' لە پارێزگای ئەنبار لەکارکەوتووە بەوهۆیەوە کارەبای سەرجەم پارێزگاکانی عێراق بچڕاوە.

 سەرچاوەیەک لە  کۆمپانیای بەرهەمهێنانی کارەبای ناوچەی باشوور بۆ ئاڤا ئاشکرای کرد، وێستگەکانی بەرهەمهێنانی کارەبای پارێزگاکانی میسان، دیوانیە، بابل، کەربەلا، نەجەف، موسەننا ، بەسرە و زیقار، بەهۆی کێشەیەکی کتوپڕی تەکنیکییەوە لەکارکەوتوون و تیمەکانمان لەوپەڕی ئامادەباشیدان بۆ گەڕاندنەوەیان بۆ خزمەتگوزارییەکان."

محەممەد نووری، سەرۆکی لیژنەی کارەبا و وزە لە پەرلەمانی عێراق بە ئاڤای ڕاگەیاند، "کارەبا لە تەواوی عێراق پچڕاوە بەهۆی کێشە لە تۆڕەکانی گواستنەوە". 
 

زانیاریی زیاتر: پچڕانی کارەبای نیشتمانی لە کاتێکدایە کە ئێستا پلەی گەرمای بەشێک لە شارەکانی نزیکبووەتەوە لە 50 پلەی سیلیزی و لە هەندێک ناوچەش کارەبای مۆلیدە ئەهلییەکانیش نییە.