هەرێمی کوردستان فریای کارەبای عێراق کەوت

ئاڤا نیوز

دوای ئەوەی بەهۆی کێشەیەکەوە ئێوارەی ئەمڕۆ کارەبای هەموو عێراق دووچاری کوژانەوەی گشتی بوو. بۆ کارپێکردنەوەی یەکەکان وەزارەتی کارەبای عێراق داوای هاوکاری لە وەزارەتی کارەبای هەرێمی کوردستان کرد. لە هەولێرەوە ڤۆڵتییەی پێویست بۆ یەکەکانی عێراق نێردراو گرفتەکە چارەسەر بوو.

وێنە گەورەکە: بەهۆی ئەو فشارە زۆری لەسەر تۆڕی کارەبای گشتی یهەیە، کاتژمێر 3ـی دوای نیوەڕۆی ئەمڕۆ دووشەممە، کارەبای هەموو عێراق دووچاری کوژانەوەی گشتی بوو. هەموو یەکەکانی بەرهەمهێنان ڕاگیران.

لێدوانی فەرمی: فارس میرخان، بەڕێوەبەری بەرهەمهێنانی کارەبای هەرێمی کوردستان بە ئاڤا میدیای وت. دوای کوژانەوەی گشتی کارەبا، یەکەکانی بەرهەمهێنانی کارەبا لە عێراق توانای داگیرسانەوەیان نەمابوو. دوای نیوەڕۆی ئەمڕۆ وەزارەتی کارەبای هەرێمی کوردستان ئامادەیی دەربڕی هەموو هاوکارییەک پێشکەش بکات، وەزارەتی کارەبای عێراق داوای ڤۆڵتیەیان کرد بۆ ئەوەی بتوانن یەکەکان دابگیرسێننەوە، بۆیە لە وێستگەکانەوە ڤۆڵتییەمان بۆ ناردن و دەستکرا بە داگیرسانەوەی یەکەکانی بەرهەمهێنان.

بەوتەی فارس میرخان، تا پێنج بۆ شەش کاتژمێری دیکە دۆخی کارەبای هەموو یەکەکانی عێراق ئاسایی دەبێتەوە.