شاخەوان عەبدوڵڵا: گفتوگۆکان دەربارەی داهاتی نانەوتی بەباشی بەڕێوەدەچن

ئاڤا نیوز

گفتوگۆکان دەربارەی داهاتی نانەوتیی هەرێمی کوردستان بەردەوامن و جێگری سەرۆکی پەرلەمانی عێراقیش دووپاتی دەکاتەوە، گفتوگۆکان بەباشی بەڕێوەدەچن.

وێنە گەورەکە: دوای ئەوەی هەردوو ئەنجوومەنی وەزیرانی هەرێمی کوردستان و عێراق، لە ناوەڕاستی مانگی ڕابردوو یاداشتی لێکتێگەیشتنی نێوانیان پەسەند کرد، گفتوگۆکانی نێوان هەردوولا بەردەوامە بۆ جێبەجێکردنی ئەو یاداشتە، بۆ ئەم مەبەستەش دەربارەی بەرهەمهێنانی نەوت و هەناردەکردنەوەی نەوتی هەرێمی کوردستان، کۆکردنەوەی داهاتی نانەوتی و ئەو بڕەی ڕادەستی عێراق دەکرێت و پرسی مووچەی مووچەخۆران هەرێمی کوردستان، چەندین کۆبوونەوە بەرێوەچووە.

لێدوانی فەرمی: شاخەوان عەبدوڵڵا، جێگری سەرۆکی پەرلەمانی عێراق، بە ئاڤای گوت: سەبارەت بە مەلەفی نەوت ڕێککەوتن کراوە و کۆتایی هاتووە، لەسەر پرسی داهاتی نانەوتی گفتوگۆکان بەباشی بەرێوەدەچن.

زانیاریی زیاتر: لە کۆبوونەوەی هەفتەی ڕابردووی شاندی وەزارەتی دارایی و ئابووریی هەرێمی کوردستان و وەزارەتی دارایی حکومەتی عێراق، ڕاپۆرتێک ئامادە کراوە و هەردوو وەزارەت سەرنج و تێبینییەکانیان خستووەتەوە  ڕوو، ئەو ڕاپۆرتەش پێشکەشی ئەنجوومەنی وەزیرانی عێراق کراوە بۆ ئەوەی گفتوگۆی لەبارەوە بکات و بڕیاری لەسەر بدات.

ئەوەی پێویستە بیزانیت: هەرچەندە دوێنێ کۆبوونەوەی ئەنجوومەنی وەزیرانی عێراق بەڕێوەچوو، بەڵام ئەو ڕاپۆرتە گفتوگۆی لەبارەوە نەکرا و باس لە مووچەی مووچەخۆرانی هەرێمی کوردستان نەکرا.