هاتنی زیارەتکاران بە دەروازەی حاجی ئۆمەران بۆ چلەی ئیمام حوسێن 100 هەزار کەسی تێپەڕاند

ئاڤا نیوز

 

تا دێ ژمارەی هاتنی زیارەتکاران بۆ چلەی ئیمام حوسێن بە دەروازەی نێودەوڵەتیی حاجی ئۆمەران زیاد دەکات، بەجۆرێک ئەمرۆ سێشەممە ژمارەی ئەو زیارەتکارانەی بە دەروازەکە هاتوچۆیان کردووە 100 هەزار کەسی تێپەڕاندووە.

 

وێنە گەورەکە: ساڵانە لە یادی چلەی ئیمامی حوسێن، پەیڕەوانی شیعە مەزهەب لە سەرانسەری جیهان ڕوو لە نەجەف و کەربەلا دەکەن. بۆ چوارەم ساڵە هەرێمی کوردستان پێشوازی لە زیارەتکاران دەکات و خزمەتگوزاریی خواردن و مانەوەیان پێشکەش دەکات.

لێدوانی فەرمی: عەقید سالار تەحسین، بەڕێوەبەری پاسپۆرت و نشینگەی حاجی ئۆمەران بە ئاڤا میدیای وت، تا ئەمڕۆ سێشەممە زیاتر لە 100 هەزار گەشتیار بە دەروازەکە هاتوچۆیان کردووە. ئەمساڵ گۆڕانکارییەک ڕووی داوە، ئەو زیارەتکارەی بە هەرێمی کوردستان دێنە ژوورەوە پێویستە هەر بە هەرێمی کوردستان بڕۆنەوە. ئەمە جگە لەوەی ئامادەکارییەکانی ئەمساڵ پێشکەوتووترن.

 

زانیاریی زیاتر: لەماوەی 12 ڕۆژدا زیاتر لە شەش هەزار زیارەتکاری شیعەی ڕووسی، جۆرجی و ئازەربایجانی بە دەروازەی نێودەوڵەتی حاجی ئۆمەران هاتوچۆیان کردووە. خەڵکی ئەو وڵاتانە پێویستیان بە ڤیزا هەیە و ئەوانەشی هاووڵاتی ئێرانی و تورکین پێویستیان بە ڤیزا نییە. 

 

ژمارەکان وا دەڵێن: وەزارەتی ناوخۆی عێراق ڕایگەیاندووە، زیاتر لە سێ ملیۆن زیارەتکاری بیانی لە دەروازەکانی عێراقەوە هاتوون. ئەو زیارەتکارانە لە وڵاتەکانی وەک ئێران، تورکیا، ڕووسیا، ئازەربایجان، جۆرجیا و چەندین وڵاتی دیکەی ناوچەکە و جیهان هاتوون.