نەتەوەیەکگرتووەکان: لە غەززە زیاتر لە 100 منداڵ لە برسان مردوون

ئاڤا نیوز

بەرپرسانی نەتەوەیەکگرتووەکان داوای گرتنەبەری ڕێوشوێنی بەپەلە دەکەن دوای ئەوەی سەرچاوە پزیشکییەکانی غەززە مردنی زیاتر لە 100 منداڵیان بەهۆی برسییەتییەوە پشتڕاست کردەوە.

 

وێنە گەورەکە: دۆخی مرۆیی لە کەرتی غەززە بەهۆی بۆردوومانی بەردەوامی ئیسرائیل و پەیڕەوکردنی سیاسەتی برسیکردن تا دێت خراپتر دەبێت و بەهۆی ئەم دۆخەی لەو کەرتە خوڵقاوە تا ئێستا دەیان منداڵ گیانیان لەدەست داوە، ئەمەش کاردانەوە و توڕەیی کۆمەڵگەی نێودەوڵەتی بەدوای خۆیدا هێناوە.

 

بڵاوکراوەی فەرمی: بەرپرسانی نەتەوەیەکگرتووەکان ڕایانگەیاند: ''ژمارەی ئەو منداڵانەی بەهۆی برسییەتییەوە لە کەرتی غەززە گیانیان لەدەست داوە بۆ زیاتر لە 100 منداڵ بەرزبووەتەوە، ئەمەش شەرمەزارییە بۆ جیهان''، هاوکات ئەو بەرپرسانە داوای هەنگاوی بەپەلەیان کرد بۆ چارەسەرکردنی ئەو دۆخە مرۆییە مەترسیدارەی کە لەو کەرتە هاتووەتەوە ئاراوە.

 

لەلایەکی دیکەوە: بەرنامەی خۆراکی جیهانی بڵاویکردەوە، زیاتر لە 300 هەزار منداڵ لە ژێر مەترسی بەدخۆراکیدان و یەک لەسەر سێی دانیشتوانی غەززە چەند ڕۆژێک بەبێ خواردن ژیان دەکەن هاوکات خەڵکی غەززە مانگانە پێویستیان بە 62 هەزار تۆن پێداویستی سەرەتایی هەیە.