عەلی عەلاق: 80%ی پارەی عێراق لە ماڵەکان هەڵگیراوە

ئاڤا نیوز

 

پارێزگاری بانکی ناوەندیی عێراق دەڵێت، %80ـی پارەی عێراق لە دەرەوەی سیستمی بانکییە و لە ماڵەکاندا هەڵگیراوە. ئەمەش بەهۆی نەبوونی متمانەیە بە سیستمی بانک.

 

وێنە گەورەکە: هەموو ئەو سزا بانکییانەی لە ڕابردوو کەرتی بانکی عێراقی گرتووەتەوە، بێ متمانەیی لای هاووڵاتییانی عێراق بە سیستمی بانک دروست کردووە.

 

لێدوانی فەرمی: عەلی عەلاق، پارێزگاری بانکی ناوەندیی عێراق بە ڕۆژنامەی سەباحی ڕاگەیاند، ئەو ڕێژە زۆرەی پارەی عێراق کە لە ماڵەکاندا هەڵگیراوە و %80 پارەی عێراق پێکدەهێنێت، ئاماژەیە بۆ نەبوونی سیستمی بانکی لە عێراق. هاوکات بانکی ناوەندی داوای لە هەموو بانکەکان کردووە لەماوەیەکی کەمدا سەرمایەکانیان بگەیەننە 400 ملیار دینار.

 

عەلی عەلاق دەشڵێت، دامەزراندنی سیستمێکی بانکی نیشتمانی تۆکمە پێویستی بە هاوبەشی ڕاستەقینە هەیە لەگەڵ بانکە نێودەوڵەتییە گەورەکاندا کە سامانەکانیان لەنێوان 300 بۆ 400 ملیار دۆلاردایە.