بەڕێوەبەری کۆمپانیای پی ڤی ئای: لەسەر هێڵین بۆ کردنەوەی سێ بنکە داخراوەکەی هەززە لە کەرکووک

ئاڤا نیوز

 

سەرەڕای هەبوونی مۆڵەتی ئیداریی ناوچەکە، بەڵام بەبیانووی نەبوونی مۆڵەتی وەزارەتی ناوخۆی عێراق، لە کەرکووک و پردێ سێ بنکەی هەززەکردنی (پشکنین) ئۆتۆمبێل داخراون، تەنیا پشکنین بۆ ئەو ئۆتۆمبێلانە دەکات کە لە ناوچە کوردستانییەکانی دەرەوەی ئیدارەی هەرێمن و تابلۆیان هی پارێزگاکانی هەرێمی کوردستانە.

 

وێنە گەورەکە: بەمەبەستی ئاسانکاری بۆ شوفێرانی نیشتەجێ لە ناوچە کوردستانییەکانی دەرەوەی ئیدارەی هەرێم، کۆمپانیایەکی هەززە سێ بنکەی پشکنینی ئۆتۆمبێلی لە سنووری کەرکووک کردووەتەوە، بەڵام لەلایەن حکومەتی عێراقەوە داخران و دەڵێن، مۆڵەتی وەزارەتی ناوخۆ دەربهێنن، ئێستا لە هەرسێ بنکەکە پشکنینی ئۆتۆمبێل ناکرێت و کارەکان وەستاون.

لێدوانی فەرمی: هەژار عەبدوڵڵا، بەڕێوەبەری (پی ڤی ئای) کە سەرپەرشتی ئەو سێ بنکەیە دەکات، بە ئاڤای گوت، "مۆڵەتی وەزارەتی ناوخۆی هەرێمی کوردستان و ئیدارەی کەرکووکمان هەیە، ئەوەی ڕوویداوە بیانوو پێگرتنە و بەشێکە لە سیاسەتی دژایەتیکردنی هەرێمی کوردستان لەلایەن بەغدا."

 

زانیاریی زیاتر: بەڕێوەبەری پی ڤی ئای دڵنیایی دا لەوەی لەگەڵ بەغدا لەسەر ‌هێڵن، بۆ ئەوەی دووبارە بنکەکان بکرێنەوە و مامەڵەی شوفێران ڕایی بکرێت.

 

ئەوەی پێویستە بیزانیت: ناوەندی پشکنینی پردێ، لە ماوەی ڕابردوودا کارئاسانییەکی گەورەی بۆ ئەو شۆفێرانەی سنووری کەرکووک دەکرد تابلۆی ئۆتۆمبێلەکانیان سەر بە پارێزگاکانی هەرێمی کوردستان. لەبری ئەوەی ڕێگەیەکی دوور ببڕن بۆ نوێکردنەوەی پشکنینی ساڵانە، دەیانتوانی سەردانی ناوەندەکانی پردێ یان چەمچەماڵ بکەن.

 

کاریگەری و لێکەوتەکان: بە داخستنی ناوەندی پردێ، هاووڵاتییان ناچار دەبن جارێکی دیکە ڕێگەی دوور و کاتێکی زیاتر بۆ گەیشتن بە ناوەندەکانی پشکنین لە شارەکانی هەرێمی کوردستان ببڕن، ئەمەش بارگرانییەکی نوێی بۆیان دروست کردووە.