کچە کوردێکی ئێزدی ڕزگاربووی دەستی داعش بەهۆی ئەشکەنجەی زۆرەوە کۆچی دوایی کرد

ئاڤا نیوز

شریهان ڕەشۆ، ئەو کچە کوردە ئێزدییەی کە نزیکەی حەوت ساڵ لەمەوبەر لە دەستی داعش ڕزگارکرابوو، ئێوارەی ڕۆژی دووشەممە بەهۆی نەخۆشییەوە لە نەخۆشخانە کۆچی دوایی کرد.

چیرۆکی سەرەکی: لە ساڵی 2014، کاتێک شریهان ڕفێندرا، زیاتر لە 10 جار لەلایەن چەکدارانی داعشەوە کڕین و فرۆشتنی پێکرابوو. لە ساڵی 2018 بە هەوڵێکی زۆری حکومەتی هەرێمی کوردستان ڕزگار کرا.

 

دوای ڕزگارکردنیشی، بەهۆی ئەو ئەشکەنجە و دەستدرێژی و ئازارە زۆرەی کە چەشتبووی، تووشی نەخۆشییەک بوو و بەردەوام کێشی لەشی دادەبەزی و لاواز دەبوو، بە شێوەیەک کە کێشی لەشی زۆر لە تەمەنی خۆی کەمتر بوو، لە کاتێکدا هێشتا تەمەنی نەگەیشتبووە 30 ساڵ.

ئەوەی پێویستە بیزانیت: سەرەڕای وەرگرتنی چارەسەری بەردەوام، ئێوارەی ڕۆژی دووشەممە شریهان بۆ یەکجاری ماڵئاوایی کرد و تەرمەکەی بۆ شنگال گواسترایەوە و لە نزیک مەزارگەی شەرەفەدین بە خاک دەسپێردرێت.

 

قووڵتر: شریهان کچی ژنە پاڵەوانێکە بە ناوی "دایە گوڵێ". دایە گوڵێ ئەو ژنە بوو کە لەنێوان دیلیی داعش و مردندا، مردنی هەڵبژارد. لە کاتی دەستگیرکردنیدا ئەمیرێکی داعشی کوشت و دواتریش خۆی شەهید کرا. ئێستاش وەک هێمایەک بۆ خۆڕاگری و بەرگری، پەیکەرێکی لە ناوەندی شارۆچکەی سنوونێ بۆ دروستکراوە.