بۆریی ئیفراز سێ چاک کرا؛ دەست بە دابەشکردنەوەی ئاو دەکرێت

ئاڤا نیوز

دوو ڕۆژە بۆریی ئاوی ئیفراز سێ لە هەولێر شکاوە، بەڕێوەبەری گشتیی ئاوی هەولێر لەوبارەیەوە دەڵێت "بۆیییەکەمان چاککردووەتەوە و دەست بە دابەشکردنەوەی ئاو دەکەینەوە".

چیرۆکی سەرەکی: ڕۆژی 11-8-2025، بۆریی ئاوی ئیفراز سێ لە هەولێر شکا، بەوهۆیەوە بەشێک لە گەڕەکەکانی هەولێر بێ ئاو بوون.

لێدوانی فەرمی: ڕابەر حوسێن، بەڕێوەبەری ئاوی هەولێر بە ئاڤا میدیای ڕاگەیاند، "لەلایەن تیمەکانمانەوە بۆریی ئاوی ئیفراز سێ چاککراوەتەوە، بەهۆی شکانی بۆرییەکەوە خەزانەکانی ئاو بەتاڵ بوون، بۆیە سەرەتا خەزانەکانمان پڕ ئاو کردەوە".

بەڕێوەبەری ئاوی هەولێر دەڵیت: کاتژمێر 06:00ی ئێوارەی ئەمڕۆ تاوەکو کاتژمێر 08:00ی بەیانی ڕۆژی چوارشەممە، دەست بە دابەشکردنی ئاو بۆ گەڕەکەکانی سەر شەقامی 40 مەتری دەکەینەوە.

ئەوەی پێویستە بیزانیت: بۆریی ئاوی ئیفراز سێ لە هەولێر، ئاو بۆ ئەو گەڕەکانە دابین دەکات کە دەکەونە سەر شەقامی شەقڵاوە تاوەکو شوێنی پێشووی ڕۆژنامەی خەبات لە ڕێگەی کەرکووک.