هەسەدە و ئەحمەد شەرع گەیشتوونەتە قۆناغێکی نوێ و گفتوگۆ بۆ لامەرکەزییەتی ڕۆژئاوای کوردستان دەکەن

ئاڤا نیوز

دوای ئەوەی حکومەتی سووریا بایکۆتی گفتوگۆکانی پاریسی کرد، بەرپرسێکی باڵای بەڕێوەبەرایەتیی خۆسەر، لەسەر داوای دیمەشق، لەگەڵ وەزیری دەرەوەی سووریا کۆبووەوە بە مەبەستی زیندووکردنەوەی دانوستانەکان.

وێنە گەورەکە: دوای پەرەسەندنی گرژییەکان، هەسەدە و ئەحمەد شەرع لە دوو ڕۆژی ڕابردوودا کۆبوونەوەیەکی نهێنییان کردووە، هەردوولا ڕێککەوتوون بۆ چارەسەرکردنی کێشەکان بیر لە بژاردەی سەربازی نەکەنەوە، بەپێی میدیاکان کۆبوونەوەکە ئەرێنی بووە و گفتوگۆکان بە ئاراستەی دۆزینەوەی شێوازێکی گونجاون بۆ لامەرکەزییەتی ئیداری بۆ ڕۆژئاوای کوردستان.

بڵاوکراوەی فەرمی: بەگوێرەی ئاژانسی هەواڵی فرانس پرێس، ئێوارەی ڕۆژی دووشەممە لەسەر داوای حکومەتی سووریا، هەریەک لە ئیلهام ئەحمەد، بەرپرسی باڵای بەڕێوەبەرایەتیی خۆسەر و ئەسعەد شەیبانی، وەزیری دەرەوەی سووریا، کۆبوونەتەوە.

زانیاریی زیاتر: بەگوێرەی سەرچاوەیەکی بەرپرسی کوردی کە قسەی بۆ ئاژانەسەکە کردووە، گفتوگۆکانی ڕۆژی دووشەممە هەوڵیانداوە جەخت لە "بەردەوامیی پرۆسەی دانوستان لە ڕێگەی لیژنەی نێوخۆیی سوورییەوە و بە سەرپەرشتیی نێودەوڵەتی" بکەنەوە، وتیشی، هەردوولا ڕێککەوتوون لەسەر ئەوەی "هیچ جێگەیەک بۆ بژاردەی سەربازی نییە." هاوکات ئەوەشی ڕاگەیاند "گفتوگۆکان لەسەر دۆزینەوەی شێوازێکی گونجاو بۆ لامەرکەزییەت چڕبوونەتەوە، بەبێ دیاریکردنی خشتەیەکی کاتی".

ئەوەی پێویستە بیزانیت: ئەم هەوڵانە لە کاتێکدان کە جێبەجێکردنی ڕێککەوتنەکەی 10ی ئازار لەنێوان هەسەدە و دیمەشقدا، سەبارەت بە تێکەڵکردنی دامەزراوە سەربازی و مەدەنییەکانی بەڕێوەبەرایەتیی خۆسەر بە دەوڵەتەوە، بەهۆی ناکۆکییەکانەوە تا ڕادەیەکی زۆر وەستاوە.