سەرۆکی ئۆکراینا پێدانی خاک بە ڕووسیا ڕەتدەکاتەوە

ئاڤا نیوز

سەرۆکی ئۆکراینا ڕەتیدەکاتەوە، ئامادەبێت لە بەرامبەر ئاشتیدا بەشێک لە خاکی وڵاتەکەی بدات بە ڕووسیا. دەشڵێت، لووتکەی ئالاسکای نێوان ئەمریکا و ڕووسیا سەرکەوتنێکی کەسییە بۆ سەرۆکی ڕووسیا.

چیرۆکی سەرەکی: لە شوباتی 2022ـەوە، جەنگی نێوان ڕووسیا و ئۆکراینا بەردەوامە و لەم ماوەیەدا ڕووسیا دەستی بەسەر چەندین ناوچەی ستراتیژیی ئۆکراینادا گرتووە. هەرچەندە کیێڤ بە فەرمی هیچ نەرمیەکی لەبارەی دەستبەرداربوون لە خاکەکەیەوە نیشان نەداوە، بەڵام سەرچاوەکان باس لەوە دەکەن کە لە پێناو گەیشتن بە ئاشتی، ئۆکراینا لەوانەیە ڕازی بێت بەوەی هەندێک لەو ناوچانەی ئێستا لەلایەن ڕووسیاوە کۆنترۆڵکراون، لەژێر دەستی مۆسکۆدا بمێنێتەوە.

لێدوانی فەرمی: ڤۆلۆدیمیر زێلێنسکی، سەرۆکی ئۆکراینا ڕایگەیاند، "ئێمە لە دۆنباس ناکشێینەوە و لە ژێر هیچ ڕێککەوتنێکدا خاکی هەرێمەکە نادەینە ڕووسیا". دەشڵێت، لووتکەی ئالاسکای نێوان ئەمریکا و ڕووسیا سەرکەوتنێکی کەسییە بۆ ڤلادیمیر پووتینی سەرۆکی ڕووسیا.

- ڕووسیا پلانی هەیە لە سێ بەرەوە هێرشی نوێ بکاتە سەر ئۆکراینا.

- هێزەکانی ڕووسیا پێشڕەوییان کردووە و تەنیا 10 کیلۆمەتر لە شارۆچکەی دۆبرۆپیلیاوە دوورن کە شارۆچکەیەکی گرنگی پڕ لە کانی خەڵووزە.

ئەوەی پێویستە بیزانیت: بڕیارە ڕۆژی هەینی، ترەمپ و پووتین لە ئالاسکا کۆببنەوە و سەبارەت بە وەستانی شەڕی نێوان ڕووسیا و ئۆکراینا گفتوگۆ بکەن. پێشبینی دەکرێت ترەمپ پێشنیازی پێدانی خاک لەبەرامبەر وەستانی شەڕ بداتە پووتین.