وەبەرهێنەرانی کوردستان بەشداری لە کۆڕبەندی ئابووریی کوردستان - عێراق - ئەرمینیا دەکەن

ئاڤا نیوز

بڕیارە شاندێکی ئابووریی هەرێمی کوردستان بۆ بەشداریکردن لە "کۆڕبەندی ئابووری هەرێمی کوردستان- عێراق-ئەرمینیا" سەردانی ئەو وڵاتە بکات.

وێنە گەورەکە: بۆ یەکەمین جارە "کۆڕبەندی ئابووری هەرێمی کوردستان-عێراق-ئەرمینیا' لە یەریڤان بەڕێوەدەچێت، ئەم کۆڕبەندە بە هاوبەشی لە نێوان هەرێمی کوردستان و عێراق و ئەرمینیا ڕێکخراوە، بڕیارە چەندین کۆمپانیای گەورەی جیهانیش لە کۆڕبەندەکەدا بەشداری بکەن.

لێدوانی فەرمی: بەرگەشت ئاکرەیی، وتەبێژی دەستەی وەبەرهێنانی هەرێمی کوردستان بە ئاڤا میدیای ڕاگەیاند: شاندێکی وەبەرهێنەران و سەرمایەداران لە سەرجەم پارێزگا و ئیدارە سەربەخۆکانی هەرێمی کوردستان، کۆتایی ئەم مانگە بۆ بەشداریکردن لە "کۆڕبەندی ئابووریی هەرێمی کوردستان-عێراق-ئەرمینیا" سەردانی ئەرمینیا دەکەن.

وتەبێژەکەی دەستەی وەبەرهێنان وتیشی: شاندەکەی هەرێمی کوردستان لەلایەن دەستەی وەبەرهێنانەوە سەرۆکایەتی دەکرێت، هەروەها 20 وەبەرهێنەر و خاوەن کار و نوێنەری کۆمپانیاکانی هەرێمی کوردستان تێیدا بەشدارن.

زانیاریی تایبەت: چەندین کۆمپانیای گەورەی جیهان لە چەندین سێکتەری جیاواز بەشداری کۆڕبەندەکە دەکەن.

ئەمەش بزانە: بڕیارە ڕۆژی 26-8-2025، لە یەریڤان کۆڕبەندەکە دەستپێبکات و بۆ ماوەی دوو ڕۆژ بەردەوام دەبێت.