پاسێکی زیارەتکاران وەرگەڕا و حەوت کەس گیانیان لەدەستدا

ئاڤا نیوز

سەرلەبەیانی ئەمڕۆ لە ڕۆژئاوای پارێزگای بەسرەی باشووری عێراق، پاسێکی زیارەتکارانی ئێران وەرگەڕا و لە ئەنجامدا حەوت کەس گیانیان لەدەستدا و 43ـی دیکەش برینداربوون.

چیرۆکی سەرەکی: لە بەیانییەوە ڕێوڕەسمی چلەی ئیمامی حوسێن لە کەربەلا دەستپێدەکات و ساڵانە ملیۆنان باوەڕداری شیعە مەزهەب لە عێراق و جیهانەوە ڕوو لە شارەکە دەکەن، ئەمساڵ ڕێوڕەسمەکە کەوتووەتە ناوەڕاستی هاوین و ئەوەش ئامادەکارییەکان و بەشداری زیارەتکارانی سەختتر کردووە، بەڵام ملیۆنان کەس بەم گەرمایە و بە جلی ڕەش دەیان کیلۆمەتر بەپێ دەبڕن و ماتەمینی بۆ کوژرانی ئیمامی حوسێن دەگێڕن.

لێدوانی فەرمی: عەقیل فەریجی، سەرۆکی لیژنەی ئەمنیی لە ئەنجوومەنی پارێزگای بەسرە ڕایگەیاند، ڕووداوەکە سەرلەبەیانی ئەمڕۆ لەسەر ڕێگای خێرا لەناوچەی ڕومێلە ڕوویداوە و لە ئەنجامدا حەوت کەس گیانیان لەدەستداوە و 43ـی دیکەش برینداربوون، قوربانییەکانیش زیارەتکاری ئێرانین و ئێستا بریندارەکان لە نەخۆشخانەی فەیحا چارەسەری پێویست وەردەگرن.