وەزارەتی سامانە سرووشتییەکان لەبارەی نەوت ڕێککەوتنی لەگەڵ بەغدا ڕاگەیاند

ئاڤا نیوز

وەزارەتی سامانە سروشتییەکانی حکومەتی هەرێمی کوردستان، بە فەرمی، ڕێككەوتنی نێوان هەردوو حكومەتی هەرێمی كوردستان و حكومەتی عێراقی لەسەر میكانیزمی هەناردەكردنەوەی نەوتی كوردستان ڕاگەیاند.

چیرۆکی سەرەکی: كۆبوونەوەكانی نێوان هەردوو وەزارەتی سامانە سروشتییەکانی حکومەتی هەرێمی کوردستان و وەزارەتی نەوتی عێراق، لە ڕۆژی 17ـی مانگی تەمموزی ڕابردووەوە دەستیپێكرد، هەر لەو ماوەیەدا، سەردانی تەواوی کێڵگە نەوتییەکانی هەرێمی كوردستان کرا و دوای هەڵسەنگاندنی کێشە هونەرییەكان و گفتوگویەکی زۆر، لە 11ـی ئەم مانگە ڕێكکەوتن لە سەر میکانیزمی هەناردەکردنی نەوتی کێڵگەکانی هەرێمی كوردستان کرا.

ناوەڕۆكی ڕێككەوتنەكە: بەگوێرەی بەرهەمی ڕۆژانەی کێڵگە نەوتییەکانی هەرێمی کوردستان، ڕێككەوتنەكە جێبەجێ دەكرێت؛ ئەویش دوای ئەوەی 50 هەزار بەرمیل بۆ پێویستی ناوخۆی كوردستان گلدەدرێتەوە، بەرهەمەکەی دیکە بۆ هەناردەکردن، ڕادەستی  کۆمپانیای سۆمۆ دەکرێت.

ڕاگەیێنراوی فەرمی: وەزارەتی سامانە سروشتییەکانی حکومەتی هەرێمی کوردستان لە ڕاگەیێنراوێكدا ئاماژەی بەوە كردووە، هەردوو وەزارەت لە سەر میکانیزمی هەناردەکردنەوەی نەوت ڕێککەوتن و کۆنووسی ڕێککەوتنەکەش لەلایەن 23 کەسایەتیی شاندی هەردوولا واژۆ کراوە، کە 17 ئەندامی شاندی وەزارەتی نەوتی عێراق بوون.

زانیاریی زیاتر: بۆ دەستپێکردنەوەی هەناردەی نەوتی هەرێمی کوردستان بەشێوەی فیعلی، حکومەتی فیدراڵ لەگەڵ حکومەتی تورکیا قسە دەکات و پرۆسەکە لە نزیكترین كاتدا جێبەجێ بکرێت.