ئەکسیۆس: ترەمپ هێشتا لە پووتین تووڕەیە

ئاڤا نیوز

کۆبوونەوەی لووتکەی نێوان ترەمپ و پووتین بەڕێوەیە و سەرچاوەیەکی ئەمریکیش ئاشکرای دەکات، ترەمپ هێشتا لە پووتین تووڕەیە.

وێنە گەورەکە: لە دوای گەڕانەوەی ترەمپ بۆ کۆشكی سپی هەوڵەکانی بۆ کۆتاییهێنان بە شەڕی زیاتر لە سێ ساڵەی نێوان ڕووسیا و ئۆکراینا خستووەتە گەڕ، بەڵام هەوڵەکان دەستکەوتێکی بەرچاویان بەدەست نەهێنا، لە چوارچێوەی بەردەوامی هەوڵە دیپلۆماسییەکان بۆ کۆتاییهێنان بە جەنگی نێوان هەردوولا، ڕۆژی هەینی هەر یەکە لە دۆناڵد ترەمپ، سەرۆکی ئەمریکا و ڤلادێمیر پووتین، سەرۆکی ڕووسیا لە ئەلاسکا کۆدەبنەوە.

زانیاریی بەدەستهاتوو: ماڵپەڕی ئەکسیۆسی ئەمریکی لە زاری بەرپرسێکی ئەمریکییەوە ئاشكرای دەکات، دۆناڵد ترەمپ، سەرۆکی ئەمریکا هێشتا لە ڤلادێمیر پووتین، سەرۆکی ڕووسیا تووڕەیە و ئەگەر هەوڵە دیپلۆماسییەکان بۆ گەیشتن بە ڕێککەوتنی ئاشتی شکست بهێنن، ئەوا ترەمپ بەردەوام دەبێت لە ناردنی چەک بۆ ئۆکراینا لە ڕێگەی ناتۆوە.