بڕیارێکی ئەمریکا مشتومڕ لەسەر چارەنووسی یەکگرتووی ئیسلامی دروست دەکات

ئاڤا نیوز

لە کاتێکدا هەوڵەکان لە واشنتن چڕبوونەتەوە بۆ ناساندنی "ئیخوان موسلمین" وەک ڕێکخراوێکی تیرۆریستی، ئەم پرسە مشتومڕ و نیگەرانیی لەسەر چارەنووسی ئەو حیزبە ئیسلامییانە دروستکردووە کە لە عێراق و هەرێمی کوردستان کار دەکەن و لە ڕووی فکرییەوە نزیکایەتییان لەگەڵ ڕەوتی ئیخوان هەیە.

ئەوەی پێویستە بیزانیت: مانگی ڕابردوو، تێد کروز، سیناتۆری کۆماریخوازی ئەمریکا، پڕۆژە یاسایەکی پێشکەش بە کۆنگرێس کرد بۆ ئەوەی ئیخوان موسلمین وەک گروپێکی تیرۆریستی بناسێنرێت. کروز هۆکارەکەی بۆ ئەوە گەڕاندەوە کە ئیخوان "پشتیوانی لە ڕێکخراوی حەماس دەکات" و بە "مەترسییەکی جددی لەسەر بەرژەوەندیی ئاسایشی نەتەوەیی ئەمریکا"ـی دانا.

لێدوانی فەرمی: مارکۆ ڕۆبیۆ، وەزیری دەرەوەی ئەمریکا ڕایگەیاند: ئەمریکا لە پرۆسەیەکدایە بۆ دەستنیشانکردنی 'ئیخوان موسلمین' وەک ڕێکخراوێکی تیرۆریستی، گوتیشی: "ئەم پرۆسەیە درێژ و ئاڵۆزە، بەڵام یەکێکە لە کارە لەپێشینەکانی ئەمریکا."

ناوبراو ڕوونیشیکردەوە کە بڕیارەکە هەموو لقەکانی ئیخوان ناگرێتەوە و وتی: "بەردەوام پێداچوونەوە بە گرووپەکاندا دەکەین. ئاشکرایە کە لقی جیاوازی ئیخوان موسلمین هەیە، بۆیە دەبێت هەر لقێک بە جیا دەستنیشان بکرێت کە کامەیان لایەنگری تیرۆرن."

لەبارەی ئەم هەنگاوەی ئەمریکا و کاریگەری لەسەر حیزبە ئیسلامییەکانی عێراق و هەرێمی کوردستان، عیماد جەمیل، سەرۆکی تیمی ڕاگەیاندنی کۆمیسیۆنی باڵای سەربەخۆی هەڵبژاردنەکانی عێراق، بە ئاڤا میدیای ڕاگەیاند: "سەبارەت بە ئێمە، مادام ئەو حیزبانە لە کۆمیسیۆن تۆمارکراون، هیچ کێشەیەکی یاساییان نییە و دەتوانن چالاکییەکانی خۆیان بەوپەڕی ئازادییەوە ئەنجام بدەن."

لەلایەکی دیکەوە: ئاڤا میدیا پەیوەندیی بە سەرچاوەیەکی باڵاوە کرد لە یەکگرتووی ئیسلامیی کوردستان. سەرچاوەکە جەختی لەوە کردەوە کە ئەو بابەتە هیچ پەیوەندییەکی بەوانەوە نییە و وتی: "ئێمە ناومان یەکگرتووی ئیسلامییە و هیچ پاشگرێکی 'ئیخوان' بە حیزبەکەمانەوە نییە. ئێمە حیزبێکی فەرمیین و لە کۆمیسیۆن خۆمان تۆمارکردووە و لە چوارچێوەی یاساکانی هەرێمی کوردستان و عێراقدا کار دەکەین."