لە کەرکوک مامێک کۆتایی بە ژیانی برازاکەی هێنا

ئاڤا نیوز

ئێوارەی ئەمڕۆ، لە گەڕەکی پەنجاعەلی شاری کەرکوک، ڕووداوێکی کوشتن ڕوویدا و تێیدا کەسێک لەلایەن مامییەوە کۆتایی بە ژیانی هێنرا.

زانیاریی بەدەستهاتوو: بەگوێرەی زانیارییەکانی پۆلیسی کەرکوک، ڕووداوەکە بەهۆی کێشەیەکی کۆمەڵایەتییەوە بووە کە لەنێوان مام (بکوژ) و برازاکە (کوژراو)ـدا هەبووە، کە دواجار بووەتە هۆی ئەوەی مامەکە برازاکەی کوشتووە.

زانیاریی زیاتر: پۆلیسی کەرکوک ڕاشیگەیاند کە هێزەکانیان لە بنکەی پۆلیسی عروبە توانیویانە لە ماوەیەکی کەمدا تۆمەتبارەکە دەستگیر بکەن، لە ئێستادا تۆمەتبارەکە بە فەرمانی دادوەر ڕاگیراوە و لێکۆڵینەوەی ورد لەبارەی هۆکاری ڕاستەقینەی ڕووداوەکە دەستیپێکردووە، هاوکات تەرمی کوژراوەکەش بۆ ئەنجامدانی توێکاری و ڕێکارە یاساییەکان ڕەوانەی پزیشکی دادی کەرکوک کراوە.