دوو هەزار عومرەكاری كورد بە هۆی نەبوونی فڕۆكەوە نەیانتوانیوە بگەڕێنەوە

ئاڤا نیوز

بەڕێوەچوونی مەراسیمی چلەی ئیمام حوسێن، گرفتی بۆ ژمارەیەکی زۆر لە عومرەکارانی کورد دروست کردووە، بەهۆی نەبوونی فڕۆکە ناتوانن بە ڕێگای ئاسمانی بگەڕێنەوە هەرێمی کوردستان.

چیرۆکی سەرەکی: بە هۆی بەڕێوەچوونی مەراسیمی چلەی ئیمامی حوسێن لە پارێزگاكانی عێراق و تەرخانكردنی گەشتە ئاسمانییەكان بۆ هێنانی زیارەتكاران، نزیكەی دوو هەزار عومرەكاری هەرێمی كوردستان لە سعوودیە گیریان خواردووە و ناتوانن بە ڕێگەی ئاسمانی بگەڕێنەوە.

لێدوانی فەرمی: كاروان ستوونی، گوتەبێژی بەڕێوەبەرایەتیی حەج و عومرەی كوردستان بە ئاڤای ڕاگەیاند: بە هۆی مەراسیمی چلەی ئیمام حوسێنەوە، ئێستا نزیكەی دوو هەزار عومرەكاری هەرێمی كوردستان لە وڵاتی سعوودیەن و بەهۆی نەبوونی فڕۆكە و گەشتی ئاسمانییەوە چەند ڕۆژێك لە گەڕانەوەیان دواكەوتوون و تاوەكوو ئێستا نەیانتوانیوە بە ڕێگەی ئاسمانی بگەڕێنەوە.

کاروان ستوونی ئەمانەشی وت:

٠ لەگەڵ هێڵی ئاسمانیی عێراق و دەستەی باڵای حەج و عومرەی عێراق لەسەر هێڵین بۆ چارەسەركردنی دۆخەكە و ژمارەیەك لە عومرەكارەكان بەڕێگەی وشكانی و بە پاس گەڕاونەتەوە، بەڵام ئەوانەی دیكە چاوەڕوانی گەشتی ئاسمانی دەكەن، بە بەردەوامی لە پەیوەندیداین لەگەڵیان و ناهێڵین مافیان بفەوتێ.

٠ ئێمە بە كۆمپانیاكانمان گوتووە كە دەبێت بچنە ژێر باری بەرپرسیارێتییەوە، هەر كەسێك و عومرەكارێك ڕازی نەبوو بە پاس بگەڕێتەوە دەبێت كۆمپانیاكە لە سعوودیە هۆتێل و خەرجییەكانی بۆ دابین بكات تاوەكو ئەوكاتەی گەشتە ئاسمانییەكان ئاسایی دەبنەوە.

٠ هەر كۆمپانیایەك كە مۆڵەتی گەشتەكانی عومرەی پێدەدرێت، دەبێت پێنج هەزار دۆلار لە بانك بخەوێنێت بۆ ئەوەی هەر کاتێک هاووڵاتی مافی خورا لەو بڕە پارەیە قەرەبووی بكرێتەوە.