ڕوانگەیەکی ئابووریی: نۆژەنکردنەوەی هێڵی کەرکووک - بانیاس پێویستی بە زیاتر لە 400 ملیۆن دۆلارە

ئاڤا نیوز

بەپێی ڕوانگەی "ئیکۆ عێراق"ـی تایبەتمەند بە بواری ئابووری، تێچووی چاککردنەوەی هێڵی بۆریی کەرکووک - بانیاس بۆ دووبارە کارپێکردنەوەی، زیاتر لە 400 ملیۆن دۆلاری پێویستە و عێراق و سووریا توانای جێبەجێکردنی ئەم پڕۆژەیەیان نییە.

بۆچی گرنگە: هێڵی بۆریی کەرکووک - بانیاس بە یەکێک لە گرنگترین پڕۆژەکانی هەناردەکردنی نەوتی عێراق دادەنرێت، چونکە کێڵگەکانی نەوتیی کەرکووک بە بەندەری بانیاسی سووریا لەسەر دەریای سپیی ناوەڕاست دەبەستێتەوە، ئەمەش بۆ بازاڕکردنی نەوتی عێراق بە دەروازەیەکی ستراتیژیی دادەنرێت.

ڕاگەیێنراوی فەرمی: ڕوانگەی "ئیکۆ عێراق" لە ڕاگەیێنراوێک ڕایگەیاند: ئەو  پشکنینانەی بۆ دیاریکردنی شوێنی ژەنگ و زیانەکانی بۆرییەکە دەکرێت، نزیکەی پێنج ملیۆن دۆلاری تێدەچێت، هاوکات تێچووی چاککردنەوەکەی لە نێوان 400 بۆ 600 ملیۆن دۆلار دەبێت.

زانیاریی زیاتر: ڕوانگەکە ڕوونیکردەوە، عێراق و سووریا توانای دابینکردنی بودجەی چاککردنەوەی بۆرییەکەیان نییە.

چاره‌سه‌ره‌كان: بەگوێرەی ڕوانگەکە، باشترین چارەسەر بۆ دووبارە هەناردەی نەوتی کەرکووک بۆ سووریا دروستکردنی هێڵێکی نوێییە بە توانایەکی زیاترەوە، ئەویش لە ڕێگەی وەبەرهێنان یان گرێبەستکردن لەگەڵ وڵاتێکی سێیەم کە خاوەنی شارەزایی و توانای دارایی بێت.