حووسییەکان بە مووشەکی هایپەرسۆنیک هێرش دەکەنە سەر فڕۆکەخانەی بن گۆریۆن

ئاڤا نیوز

هێزە چەکدارەکانی حووسییەکانی یەمەن ڕایدەگەیێنێت، فڕۆکەخانەی لود (بن گۆریۆن)ـیان لە نزیک تەلئەبیب بە مووشەکێکی بالیستی هایپەرسۆنیک کردووەتە ئامانج.

ڕاگەیێنراوی فەرمی: بەگوێرەی ڕاگەیێنراوێک، هێزە چەکدارەکانی یەمەن ئاشکرایان کرد کە هێزی مووشەکیی سوپاکەیان "ئۆپەراسیۆنێکی سەربازیی جۆریی" ئەنجامداوە و فڕۆکەخانەی لودیان بە مووشەکێک لە جۆری "فەڵەستین 2" کردووەتە ئامانج.

هەر بەگوێرەی ڕاگەیێنراوەکە، ئەم هێرشە "وەک سەرکەوتنێک بۆ گەلی ستەملێکراوی فەڵەستین و موجاهیدەکانیان" و وەڵامێک بۆ "تاوانەکانی کۆمەڵکوژی و برسیکردن" لە کەرتی غەززە ئەنجامدراوە.

زانیاریی زیاتر: حووسییەکان بانگەشەی ئەوەشیان کرد کە "ئۆپەراسیۆنەکە بە سەرکەوتوویی ئامانجەکەی خۆی پێکاوە و بووەتە هۆی هەڵهاتنی ملیۆنان نیشتەجێبووی ئیسرائیلی بۆ پەناگەکان و ڕاگرتنی جووڵەی فڕۆکەخانەکە."

لەلایەکی دیکەوە: حووسییەکان جەختیان لەوە کردەوە کە چاوەدێری بارودۆخی مەیدانیی غەززە دەکەن و متمانەی تەواویان بە توانای گرووپە فەڵەستینییەکان هەیە بۆ "تێکشکاندنی جووڵەکانی دوژمن". هەروەها بەڵێنیان دا کە "ئۆپەراسیۆنە پشتیوانییەکانیان چڕتر دەکەنەوە تاوەکو دەستدرێژییەکان ڕادەگیرێن و گەمارۆی سەر غەززە هەڵدەگیرێت."