قایمقامی هەولێر: ئەو کەسەی ڕیکلامەکەی کردووە دەدرێتە دادگا و بەنزینخانەکەش دادەخرێت

ئاڤا نیوز

لەسەر بڵاوکردنەوەی ڕیکلامێک بۆ بەنزینخانەیەک لە هەولێر، بەنزینخانەکە دادەخرێت، ئەو کەسەی ڕیکلامەکەشی کردووە دەدرێتە دادگا.

چیرۆکی سەرەکی: بڵاوبوونەوەی ڕیکلامی بەنزینخانەیەک لە هەولێر، لە ڕیکلامەکە کچە مۆدێلێک بەنزین دەڕێژێت و هەندێ دەستەواژە بەکاردێنێت و بە ڕووداوەکەی چەند ڕۆژی ڕابردووی بەنزینخانەکەی شاری هەولێری دەبەستێتەوە کە تێیدا سێ کەس کوژران، ئەم ڕیکلامەش، کاردانەوە و ناڕەزایەتی زۆری لێکەوتەوە.

لێدوانی فەرمی: نەبەز عەبدولحەمید، قایمقامی قەزای ناوەندی هەولێر بە ئاڤای گوت: ئەو بەنزینخانەیە ڕیکلامەکەی بۆ کراوە دادەخەین و ئەو کەسەشی ڕیکلامەکەی کردووە دەدەینە دادگا.

لەلایەکی دیکەوە: دوای کاردانەوەکان کچە مۆدێلەکە لە کورتە ڤیدیۆیەک ڕوونکردنەوەی دا کە گوایە ئاگاداری ڕووداوی کوشتنەکە نەبووە، بەڵام ئەم ڕوونکردنەوەی هیچ کاریگەری لەسەر ناڕەزایەتیەکان نەبوو.