سووریا ڕێگەی بە لاریجانی نەداوە ئاسمانەکەی بۆ چوونە لوبنان بەکاربهێنێت

ئاڤا نیوز

میدیاکانی تورکیا ئاشکرایان کرد کە دەسەڵاتدارانی سووریا، دوێنێ چوارشەممە، ڕێگرییان لە فڕۆکەیەک کردووە کە بەرپرسێکی باڵای ئێرانیی هەڵگرتووە، لە بەکارهێنانی ئاسمانی سووریا، ئەمەش فڕۆکەکەی ناچار کردووە ڕێڕەوەکەی بگۆڕێت.

چیرۆکی سەرەکی: بەرەبەیانی ڕۆژی چوارشەممە 13ـی ئاب عەلی لاریجانی، ئەمینداری نوێی ئەنجوومەنی باڵای ئاسایشی نیشتمانیی ئێران دوای سەردانەکەی بۆ عێراق سەردانی لوبنانی کرد و لە فڕۆکەخانەی بەیرووت لەلایەن بەرپرسانی لوبنانەوە پێشوازیی لێکرا.

بڵاوکراوەی فەرمی: ماڵپەڕی "تورکیا ئەلیەوم" ئاماژەی بەوەدا کە دەسەڵاتدارانی سووریا ڕەتیانکردووەتەوە مۆڵەتی چوونەناو کایەی ئاسمانیی سووریا بدەنە فڕۆکەیەکی ئێرانی کە عەلی لاریجانی، ئەمینداری گشتیی ئەنجوومەنی باڵای ئاسایشی نەتەوەیی ئێرانی هەڵگرتبوو، لە کاتی گەشتەکەیدا لە عێراقەوە بۆ لوبنان، ئەمەش فڕۆکەکەی ناچار کردووە ڕێڕەوەکەی بگۆڕێت و بە ئاسمانی تورکیادا تێپەڕێت.

هۆکارە زانراوەکان: ئەم هەنگاوە لە چوارچێوەی سیاسەتێکدایە کە لە مانگی کانوونی یەکەمی ڕابردووەوە پەیڕەو دەکرێت، کە بریتییە لە قەدەغەکردنی هاتنەناوەوەی سەرجەم فڕۆکە ئێرانییەکان بۆ ئاسمانی سووریا، ئەمەش دوای ڕووخانی ڕژێمی بەشار ئەسەدی سەرۆکی لەسەرکارلادراو دێت.

ئەوەی پێویستە بیزانیت: ڕێگریکردنی دەسەڵاتدارانی سووریا لە تێپەڕبوونی فڕۆکە ئێرانییەکان، هێڵەکانی پێشووی گەیاندنی چەک و چەکداری بۆ "حیزبوڵڵا" لە لوبنان ڕاگرتووە، هەروەها جەختی لە پچڕانی تەواوەتیی پەیوەندییەکانی نێوان حکومەتی سووریا و تاران کردووەتەوە.