زیاتر لە 100 ڕێکخراوی نێودەوڵەتی داوایەک ئاراستەی ئیسرائیل دەکەن

ئاڤا نیوز

بەهۆی قەدەغەکردنی گەیشتنی هاوکارییە مرۆییەکان بۆ غەززە، زیاتر لە 100 ڕێکخراوی مرۆیی نامەیەکی هاوبەشیان واژۆ کردووە و داوایەکیان پێشکەشی ئیسرائیل کردووە.

وێنە گەورەکە: ئیسرائیل گەمارۆی خستووەتە سەر کەرتی غەززە و برسییەتی لە کەرتەکە بڵاو بووەتەوە و بە هۆیەوە زیاتر لە 200 کەس لە برسا مردوون. هاوکات سەربازانی ئیسرائیل زیاتر لە  هەزار و 500 کەسیان لە سەرەی وەرگرتنی یارمەتییەکان کوشتووە.

بڵاوکراوەی فەرمی: لە نامە هاوبەشەکەدا داوا لە ئیسرائیل کراوە واز لە "بەکارهێنانی قەدەغەکردنی یارمەتییەکان وەک ئامرازێک" لە غەززە بهێنێت، چونکە "برسێتی لە ناوچەکەدا تووندتر دەبێت".

زانیاریی زیاتر: ڕێکخراوە مرۆییەکان، لەوانەش ئۆکسفام و پزیشکانی بێ سنوور، دەڵێن ڕێگەیان پێنادرێت هیچ هاوکارییەک پێشکەش بە غەززە بکەن و تەنیا لە مانگی تەمووزدا زیاتر لە 60 داواکاریی ڕێکخراوەکان بۆ گەیاندنی یارمەتی بە کەرتی غەززە لەلایەن ئیسرائیلەوە ڕەتکراونەتەوە.