لیژنەی باڵای ئەمنی: 44 هەزار سەرپێچی خێرایی لە ماوەی چلەی ئیمام حوسێن تۆمارکراون

ئاڤا نیوز

لیژنەی باڵای ئەمنی، تۆمارکردنی 44 هەزار سەرپێچیی خێرایی لە ماوەی زیارەتە ملیۆنییەکەدا ڕاگەیاند و جەختی کردەوە کە بەڕێوەبەرایەتیی هاتووچۆ بەردەوامە لە چاودێریکردن و تۆمارکردنی سەرپێچییەکان و گرتنەبەری ڕێکاری یاسایی پێویست بەرامبەر سەرپێچیکاران.

وێنە گەورەکە: یادی چلەی ئیمام حوسێن یەکێکە لە گەورەترین بۆنە ئایینییەکانی موسڵمانانی شیعە لە جیهاندا کە 40 ڕۆژ دوای عاشورا بەڕێوەدەچێت. ساڵانە ملیۆنان زیارەتکار لە ناوخۆی عێراق و وڵاتانی جیهانەوە بەرەو شاری کەربەلا بەڕێدەکەون بۆ نوێکردنەوەی ماتەمینی و بەشداریکردن لە ڕێوڕەسمەکاندا لە مەزارگەی ئیمام حوسێن و حەزرەتی عەباس.

لێدوانی فەرمی: عەمید میقداد میری، وتەبێژی فەرمیی لیژنەکە، ئاماژە بۆ ئەوە دەکات، "بەڕێوەبەرایەتیی گشتیی هاتووچۆ، لە ڕێگەی ئامێرەکانی ڕادارەوە کە لەسەر ڕێگا نێودەوڵەتییەکان دانراون، نزیکەی 44 هەزار سەرپێچیی خێرایی لە ماوەی زیارەتە ملیۆنییەکەدا تۆمارکردوون."

"ژمارەی سەرپێچییەکان لە ماوەی زیارەتە ملیۆنییەکەی ئەمساڵدا بە ڕێژەی 50% زیادیکردووە بەراورد بە زیارەتی ڕابردوو، واتە دوو هێندەی ئەو سەرپێچییانەی کە ساڵی ڕابردوو تۆمارکرابوون، ئەمەش لە ئەنجامی زیادکردنی ژمارەی ئامێرەکانی ڕادارە لە ئەمساڵدا بە بەراورد لەگەڵ ساڵانی پێشوو."

زانیاریی زیاتر: بەگوتەی عەمید میری، "بەڕێوەبەرایەتیی گشتیی هاتووچۆ بەردەوامە لە چاودێریکردن و تۆمارکردنی سەرپێچییەکان و گرتنەبەری ڕێکاری یاسایی بەرامبەر ئەو شۆفێرانەی پابەند نین، ئەمەش بۆ پاراستنی سەلامەتیی هاوڵاتیان و ئاسانکاریی هاتووچۆ."

ئەوەی پێویستە بیزانیت: پێشتر بە مەبەستی پاراستنی زیارەتکاران، لیژنەی باڵای ئەمنی بۆ زیارەتە ملیۆنییەکان، داوای لە هاووڵاتیان و شۆفێران کردبوو پابەند بن بەو خێراییانەی دیاریکراون و پشکنینی تایەکانیان بکەن و دڵنیاببنەوە لە باشییان، بۆ دوورکەوتنەوە لە ڕووداوەکان و پاراستنی گیانیان لە وەرزی زیارەتەکەدا.