لە کەرکووک ئەندامێکی دیاری داعش بە ئۆپەراسیۆنێکی ئاسمانی دەستگیرکرا

ئاڤا نیوز

لە ئۆپەراسیۆنێکی هاوبەشی هێزەکانی ئەمریکا و دژەتیرۆری کوردستان-سلێمانی، ئەندامێکی دیاری ڕێکخراوی "داعش" لە باشووری ڕۆژئاوای پارێزگای کەرکووک دەستگیرکرا.

وێنە گەورەکە: ئەگەرچی چەکدارانی داعش لە عێراق شکستیان هێناوە و هیچ شوێنێکیان لەدەست نەماوە، بەڵام گەڕان بەدوای شانەی نووستووی چەکدارانی ئەو ڕێکخراوە بەردەوامە.

زانیاریی بەدەستهاتوو: سەرچاوەکی ئەمنی لە پارێزگای کەرکووک بە میدیای عێراقی ڕاگەیاند، "ئۆپەراسیۆنەکە بە دوو هێلیکۆپتەر لە گوندی سەیهودی سەر بە ناحیەی ڕیاز، بە دووری 50 کیلۆمەتر لە باشووری ڕۆژئاوای کەرکووک ئەنجامدرا و هێزەکە توانیویەتی داواکراوەکە بەبێ هیچ پێکدادانێک دەستگیر بکات."

بە وتەی سەرچاوەکە "کەسە دەستگیرکراوەکە بە یەکێک لە ئەندامە دیارەکانی ڕێکخراوەکە دادەنرێت و گومانی لێدەکرێت تێوەگلابێت لە ئەنجامدانی کردەوەی تیرۆریستی دژی هێزە ئەمنییەکان و هاووڵاتیانی مەدەنی لە ناوچە جیاجیاکانی کەرکووک و ناوچەکانی دەوروبەری."