سوودانی: دروشمی سیاسی لە زیارەتی ئیمام حوسێن ڕەتدەکەینەوە

ئاڤا نیوز

سەرۆکوەزیرانی عێراق، ڕەتکردنەوەی بەکارهێنانی هەر دروشمێکی سیاسی لە مەراسیمی چلەی ماتەمینیی ئیمام حوسێندا ڕاگەیاند.

چیرۆکی سەرکی: ڕۆژی پێنج شەممە 14-8-2025، محەممەد شیاع سوودانی، سەرۆکوەزیرانی عێراق بەئامادەبوونی وەزیرانی ناوخۆ، تەندروستی، کارەبا و گواستنەوە، لەگەڵ پارێزگارانی کەربەلا، بابل، نەجەف و سەرۆکی دەستەی حەج و عومرە و سەرۆکی لیژنەی خزمەتگوزاریی زیارەتە ملیۆنییەکان، سەردانی بارەگای فەرماندەیی ئۆپەراسیۆنە هاوبەشەکانی لە بەغدا کرد و لەڕێگەی ڤیدیۆ کۆنفرانسەوە چاودێریی بەڕێوەچوونی پلانە ئەمنی و خزمەتگوزارییەکانی تایبەت بە زیارەتی چلەی ماتەمینی ئیمام حوسێن کرد.

ڕاگەیێنراوی فەرمی:  نووسینگەی ڕاگەیاندنی سەرۆکوەزیران بڵاویکردەوە: سوودانی داوای کردووە سوود لە سەرکەوتنی زیارەتی چلەی ماتەمینی ئیمام حوسێن وەربگیرێت بۆ سەرخستنی زیارەتی ساڵیادی کۆچی دوایی پێغەمبەری مەزن کە لەشاری نەجەف بەڕێوەدەچێت.

بەگوێرەی ڕاگەیاندنەکە،  سوودانی جەختی لەوە کردووەتەوە کە دیاردەی دروشمی سیاسی و قۆستنەوەی زیارەت بۆ مەرامی تایبەت بە تەواوی ڕەتکراوەیە.

ئەوەی پێویستە بیزانیت: چلەی ماتەمینی ئیمامی حوسێن رۆأی پێنجشەممە 14-8-2025 دەستی پێکرد و هەر ئەو ڕۆژە کۆتایی بە ڕێوڕەسمەکە هات، بەڵام زیارەتکارانی شیعەمەزهەب چەند ڕۆژێکە لە ناوخۆی عێراق وڵاتانی دیکە سەردانی کەربەلایان کردووە.