تا كۆتایی ئەم مانگە دهۆک بە تەواوی دەبێتە خاوەنی كارەبای 24 كاتژمێری

ئاڤا نیوز

تا کۆتایی ئەم مانگە، گەڕەکەکانی شندۆخا، ئیتیتێ، تەناهی و حەوشکێ لە سەنتەری شاری دهۆک، دەبنە خاوەنی کارەبای 24 کاتژمێری، بەمەش تەواوی گەڕەکەکانی شارەکە لە پرۆژەی ڕووناکی سوودمەند دەبن.

وێنە گەورەکە: مانگی تشرینی دووەمی ساڵی ڕابردوو، مەسرور بارزانی، سەرۆکوەزیرانی هەرێمی کوردستان، پڕۆژەی ڕووناکیی کارەبای 24 کاتژمێریی ڕاگەیاند و بەپێی پڕۆژەکە؛ تا کۆتایی ساڵی 2026، تەواوی هاووڵاتیانی هەرێمی کوردستان لە پڕۆژەکە سوودمەند دەبن.

زانیاریی بەدەستهاتوو: سەرچاوەیەک لە تیمی پرۆژەی ڕووناکی تایبەت بە ئاڤا ڕایگەیاند، پاش تەواوبوونی پرۆژەی ڕووناکی لە سەرجەم گەڕەکەکانی سەنتەری شاری دهۆک، لە هەنگاوی داهاتوودا کارەبای 24 کاتژمێری دەگەیێندرێتە قەزا و ناحیەکانی پارێزگای دهۆک و بڕیارە لە نزیکترین کاتدا تەواوی ناوچەکانی پارێزگای دهۆک لە پرۆژەی ڕووناکی سوودمەند بن.

ئەوەی پێویستە بیزانیت: لە سەنتەری شاری دهۆک، پرۆژەی ڕووناکیی کارەبای 24 کاتژمێری گەیشتووەتە 81 هەزار هاوبەش لە کۆی 118 هەزار هاوبەشی کارەبا لە شارەکە، لەسەر ئاستی کۆی پارێزگای دهۆکیش نزیکەی 70%ـی هاوبەشانی کارەبا لە پرۆژەی ڕووناکی سوودمەند بوونە. هاوکات بەهۆی پرۆژەکەوە، 310 موەلیدەی گەڕەکەکانی ئەو شارە کوژاوەتەوە.