عێراق زیاتر لە 25 هەزار هاووڵاتی لە کەمپەکانی سووریاوە دەگەڕێنێتەوە

ئاڤا نیوز

فەرماندەیی ناوەندیی ئەمریکا ئاشکرای کرد، حکومەتی عێراق هەنگاوەکانی بۆ گەڕاندنەوەی زیاتر لە 25 هەزار هاووڵاتی خۆی لە کەمپەکانی سووریاوە خێراتر کردووە.

ڕاگەیێنراوی فەرمی: فەرماندەیی ناوەندیی ئەمریکا ڕایگەیاند: لە ساڵی 2024 ـەوە، عێراق بە ڕێژەی 165٪ لە ژمارەی ئەو هاووڵاتییانەی کە لە کەمپەکانی هۆل و ڕۆژن گەڕاندووەتەوە، ئەمەش بە بەراورد بە ساڵانی پێشووتر گۆڕانکارییەکی یەکلاکەرەوە نیشان دەدات.

ئەم بەرزبوونەوەیە لە پرۆسەی گەڕاندنەوەدا "بووەتە هۆی گەڕانەوەی 80%ـی ئەو عێراقییانەی کە پێشتر لە کەمپی هۆل نیشتەجێبوون.

زانیاریی زیاتر: فەرماندەیی ناوەندیی ئەمریکا ئەم دەستکەوتەی بە هەنگاوێکی گرنگ داناوە بۆ کەمکردنەوەی ئەگەری بەسەربازگرتنی تووندڕەوان و داخستنی لاپەڕەیەکی سەرەکی لە دەرەنجامەکانی شکستی مەیدانیی ڕێکخراوی داعش.

هاوکات جەختیشی لە ڕۆڵی سەرەکیی عێراق کردەوە وەک هاوبەشێک لە هەوڵەکانی هاوپەیمانیی نێودەوڵەتی بۆ لەناوبردنی ڕێکخراوەکە، ئەمەش دەبێتە بەهێزکردنی ئاسایشی نیشتمانی و سەقامگیریی ناوچەکە.

ئەوەی پێویستە بیزانیت: کەمپی هۆل، یەکێکە لە گەورەترین کۆمەڵگەکانی نیشتەجێکردنی ژن و منداڵی خێزانەکانی داعش لە ڕۆژئاوای کوردستان و نزیکەی 50 هەزار ژن و منداڵی تێدا هێڵدراوەتەوە.

لە ساڵی 2021ـەوە حکومەتی عێراق بە هاوکاریی ڕێکخراوە نێودەوڵەتییەکان، دەستی بە گەڕاندنەوەی خێزانە عێراقییەکان کردووە. تا ئێستا زیاتر لە 25 هەزار کەس، کە زۆرینەیان ژن و منداڵن، گەڕێندراونەتەوە و لە کەمپی "جەدعە" لە نەینەوا نیشتەجێ کراون، بەپێی ڕاپۆرتە نێودەوڵەتییەکانیش ئێستا نزیکەی 18 بۆ 20 هەزار عێراقی لەو کەمپە ماوەنەتەوە.