هاوردەکردنی ئۆتۆمبێلی چینی بۆ هەرێمی کوردستان بەردەوامە

ئاڤا نیوز

بڕیاری قەدەغەکردنی هاوردەکردنی ئۆتۆمبێلی چینی لەلایەن وەزارەتی بازرگانی عێراق دەرکراوە، بەڵام بڕیارەکە نەگەیشتووەتە هەرێمی کوردستان و هاوردەکردنی ئۆتۆمبێلت چینی لە دەروازە سنوورییەکانەوە ئاساییە و قەدەغە نەکراوە.

وێنە گەورەکە: لەم ساڵانەی دواییدا هاوردەکردنی ئۆتۆمبێلی چینی بۆ عێراق و هەرێمی کوردستان بە ئاستێکی زۆر زیادی کردووە، بەشێک لەو ئۆتۆمبێلانە بە دیزاین و لۆگۆ و تیابەتمەندی براندە بەناوبانگەکانی ئۆتۆمبێل کۆپی کراون، خەڵکیش بەهۆی هەرزانی نرخەکانیان دەیانکڕن.

لێدوانی فەرمی: نەوزاد شێخ كامیل، بەڕێوەبەری گشتی لە وەزارەتی بازرگانی و پیشەسازیی ھەرێمی كوردستان، بە ئاڤا میدیای ڕاگەیاند: ھیچ بڕیارێكمان بەدەست نەگەیشتووە بۆ ڕاگرتن و قەدەغەکردنی ھاوردەكردنی ئۆتۆمبێلی چینی.

ھاوردەكردنی ئۆتۆمبێل بۆ ھەرێمی كوردستان، تەنیا لەشەش مانگی سەرەتای ئەمساڵدا گەیشتووەتە زیاتر لە 90 ھەزار ئۆتۆمبێل.

لەلایەکی دیکەوە: نەوزاد شێخ كامیل باسی لەوەشکرد: بەپێی بڕیارێکی ئەنجوومەنی وەزیران لە هەرێمی کوردستان، تەنیا ڕێگە هاوردەکردنی ئۆتۆمبێلی تازە دروستکراو دەدرێت و ئۆتۆمبێلی کۆن ڕێگە لێگیراوە.

ئەوەی پێویستە بیزانیت: بۆ قەدەغەکردنی هاوردەکردنی هەر بەرهەمێک پێویستە عێراق بە فەرمی نووسراو ئاراستەی کوردستان بکات، بۆ قەدەغەکردنی هاوردەکردنی ئۆتۆمبێلیش تاوەکو ئێستا هیچ نووسراوێک نەگەیشتووەتە دەست بەرپرسان.