وەزیری وزەی توركیا: چاوەڕوانی ڕێككەوتنی هەولێر و بەغداین

هەواڵ
16 ئاب

شەیری بکە لە:

وەزیری وزەی توركیا: چاوەڕوانی ڕێككەوتنی هەولێر و بەغداین

یەکێک لە کێڵگە نەوتییەکانی هەرێمی کوردستان

ئاڤا نیوز

وەزیری وزە و سەرچاوە سرووشتییەكانی توركیا دەڵێت، بۆریی نەوتی عێراق - توركیا هیچ كێشەیەكی تەكنیكیی نییە و بۆ دەستپێكردنەوەی هەناردەكردنی نەوتی هەرێمی كوردستانیش چاوەڕوانی ڕێككەوتنی هەولێر و بەغداین.

وێنە گەورەکە: لە 2023-03-25 بە بڕیاری دادگای ناوبژیوانی پاریس هەناردەکردنی نەوتی هەرێمی کوردستان ڕاگیرا، بەڵام دوای نزیکەی دوو ساڵی لە 2025-08-13 هەردوو وەزارەتی سامانە سرووشتییەکانی حکومەتی هەرێمی کوردستان و وەزارەتی نەوتی عێراق لەسەر دەستپێکردنەوەی هەناردەکردنی نەوتی خاوی هەرێم بەپێی میکانیزمێکی تایبەت ڕێککەوتن.

لێدوانی فەرمی: ئالپئارسڵان بایراکتار، وەزیری وزە و سەرچاوە سروشتییەکانی تورکیا، بە سكای نیوزی ڕایگەیاند: بۆریی نەوتی توركیا - عێراق توانای گواستنەوەی 1.5 ملیۆن بەرمیل نەوتی لە ڕۆژێکدا هەیە، بەڵام هیچ کاتێک بە تەواوی توانای خۆی کاری نەکردووە.

- توركیا لە ڕووی تەکنیکییەوە بە تەواوی ئامادەیە بۆ دەستپێکردنەوەی هەناردەکردنی نەوتی هەرێمی کوردستان لەڕێگەی بەندەری جەیهانەوە، بەڵام چاوەڕوانی ڕێككەوتنێكی گشتگیری نێوان هەولێر و بەغداین.

- بەم دواییانە حکوومەتی عێراقمان ئاگادار کردووەتەوە کە ڕێککەوتنی ئێستا چیدیکە لە ئاستی چاوەڕوانیدا نییە و وەڵامدەرەوەی پێداویستییەکانی وزەی جیهانیی ئەمڕۆ نییە، ئێمە ڕەشنووسی ڕێککەوتنێکی نوێمان بۆ عێراق ناردووە و هاوكات پێداچوونەوەش بە داڕشتنی ڕەشنووسە نوێیەکە دەکەین، بە هیواین تیمە تەکنیکییەکان بەم زووانە کۆببنەوە بۆ دەستپێکردنی دانوستان لەسەر ڕێککەوتنە نوێیەکە.

- هێڵی بۆریی نەوتی عێراق - تورکیا لە 4-10-2023ـەوە ئامادەیە بۆ کارکردن و هیچ کێشەیەکی تەکنیکی نییە، بەڵام دواکەوتنی دەستپێکردنەوەی هەناردەکردنەکە پەیوەندی بە لایەنی تورکیاوە نییە.