بۆچی لە لووتکەی ئەلاسکا وەڵامی پرسیاری ڕۆژنامەنووسان نەدرایەوە؟

ئاڤا نیوز

دوای کۆتاییهاتنی لووتکەی ئەلاسکا هەر یەکە لە ترەمپ و پووتین لەکۆنفرانسێکی ڕۆژنامەوانیدا لێدوانی خۆیان پێشکەش کرد، بەڵام وەڵامی پرسیاری ڕۆژنامەنووسانی تێدا نەدرایەوە، ڕووسیاش لەسەر ئەم پرسە ڕوونکردنەوە دەدات و هۆکارەکەی بۆ ئەوە دەگەڕێنێتەوە کە لێدوانی سەرۆکەکان هەموو شتێکی تێدا بووە.

چیرۆکی سەرەکی: ڕۆژی هەینی لووتکەی ئەلاسکا بەڕێوەچوو و هەر یەکە لەدۆناڵد ترەمپ، سەرۆکی ئەمریکا و ڤلادێمیر پووتین، سەرۆکی ڕووسیا لەسەر پرسی جەنگی ئۆکراینا گفتۆگۆیان کرد، دوای کۆتاییهاتنی لووتکەکە لە کۆنفرانسێکی ڕۆژنامەوانی هاوبەشدا، هەردوولا گفتۆگۆیەکانیان  بە بوونیادنەر وەسف کرد. 

زانیاریی بەدەستهاتوو: ئاژانسی هەواڵی ریا نۆڤۆستی ڕووسیا لە زاری دیمیتری پێسکۆڤ، وتەبێژی کرێملینەوە ئاشكرای کردووە، ''هۆکاری ئەوەی پووتین و ترەمپ، وەڵامی پرسیاری ڕۆژنامەنووسانیان نەدایەوە، ئەوە بووە کە لێدوانەکانیان "هەموو شتێکی تێدابووە. ''

زانیاریی زیاتر: پێسکۆڤ وتیشی، "گفتوگۆکان ئەرێنی بەرهەمدار بوون و ڕێککەوتن لەسەر زۆر خاڵ کرا. ژمارەیەکی زۆر کەمیان ماون" ڕێککەوتنیان لەسەر بکرێت.